Country singer Zach Bryan-a’n Taylor Swift pawi a sawi avangin thupha chawi

Tunlai celebrity khawvelah Taylor Swift pawi sawi chu a pawi thui tlat zel a, chu chu country singer Zach Bryan pawhin a takin a tawng a, thupha a chawi chul mai a ni.
Zach Bryan hian Taylor Swift leh Kanye West khaikhinin, X-ah “Eagles > chiefs,” (Chiefs aiin Eagles an ropui zawk) tih leh ‘Kanye > Taylor’ (Taylor aiin Kanye a ropui zawk) tih tweet-in, “Tunge ka ngaihdan min tawmpui?” a ti zui nghal bawk.
Mahse, a beisei angin thil a kal ta lo, hmun hrang hranga Swifties rualin Zach chu an han chuk rawn ta tak tak mai a, Zach Bryan chuan a X account delete-in, Instagram-ah thupha chawina a tichhuak nghal a, a ruih vanga chutiang thulawilo chu lo sawi chhuak palh a nih thu sawiin ngaihdam a dil ta chung mai a ni.
Taylor-i ngaihzawng Travis Kelce chu Kansas City Chiefs player, tight end niin, Swift hi Kanye nena chanchin duhawm lo tak nei tawh, an inkara neuh neuh awm ve reng a lo bawk a, hetiang karah Chiefs elpui Eagles leh Taylor nena inhmelmak Kanye te hming lam chhuak a, ropui zawk anga an rawn au chhuahpui ta mai hi a tihsual zia a inhrechhuak rang khawp mai.
Zach chuan, “Min lo hriatsak tura ka duh che u chu Taylor rawn bei hrim hrim ka ni lo. Rui chungin anni pahnih kha ka khaikhin a, a rawn chhuah dan a dik ta lo a ni. Ye chungchangah thu leh hla a tam tih ka hria a, kei chuan a rimawi ngawr ngawr a ni ka rawn sawi ni. Taylor-i music te ka ngaina a, kei pawh mihring ve mai thu mawl tak tak post ching ve tak ka ni tih min lo hriat sak teh u.
“Twitter avangin ka buai ngun ta, chuvangin ka tan khawih ve tawh loh law law hi a tha zawk a ni. Taylor-i fans ka tih lunghnur zawng zawng te chungah thupha ka chawi e. Min lo hrethiam teh u theih tawp ka chhuah ve a nia…musician a (Taylor) nih angin ka ngaisang a, rimawi khawvela a hniak hnutchhiah tawh te hi ka dah hniam emaw ka ngaina lo emaw in lo ti ang tih hi ka hlauh ber a ni,” a ti bawk.
Zach Bryan chuan a thupha chawina tihtawp nan a fan-te chu rui chunga tweet lo tura hrilhin, “Lem deuh sak tawh hnuah chuan tweet suh u,” a ti nawn deuh mawlh mawlh mai a ni.