Court-ah Rubiales inlan dawn

Court-ah Rubiales inlan dawn
Spanish Football Federation presi-dent hna bansan ta Luis Rubiales chu Spain forward Jenni Hermoso kiss thubuaiah Zirtawpni hian Madrid court-a a inlan tura tih a ni.
Tarlan tawh thin angin, August ni 20 Women’s World Cup final lawmman sem tuma khatih laia Spanish FA president-in a hmuia a fawh kha Hermoso chuan a remtihna tel lo a nih thu sawi chungin a lungawilohna court-ah a thlen a, hmeichhiat mipatna lama intihluihna case ziahluh a nih tak avangin a tira inhriatthiamna leh mi pahnih remtihnaa chet thawh a nih thu sawitu Rubiales hi high court judge chuan an punnaa insawifiah turin a ko ta a ni.
Kum 33-a upa Hermoso ngeiin kha kiss kha a remtihna tel lo a nih thu sawi mah se magistrate hmaa inlan tur Rubiales chuan tunkar Thawhlehni thleng khan Piers Morgan laka interview a hmachhawn tumin mi pahnih inhriat-thiamtawnna leh remtihna a nih thu a la sawi fan a, court pawmpui khawpin insawifiah zo tak ang maw?!
A tirah Spanish FA president a nihna atanga ban a tum loh thu sawi mah se Fifa inrawlhin a suspend ta hial a, nawrna nasa zel leh court thubuai hial a luh tak avangin Pathianni khan a president nihna atangin a inhnukdawk ta nge nge a, chutih rualin Uefa executive committee vice-president a nihna atang pawhin banna a thehlut nghal.