Court building sakna tur thlak leh vangin lungawilo

Lunglei District Court building sakna tura sawrkarin Commerce department ram a lo pek tawh chu Zonal Geology & Mining department office-a sawrkarin a pek leh daih avanga lungawiloin BAR Association Lunglei chuan September 25 atang khan tiamchin awm loin District Court staff leh Geology & Mining thawktute pisa kai tur an dang.
Mizoram BAR Association (MBA) Sub Hqrs. Lunglei sawi danin, 2022 November 22-a cabinet thukhawm chuan District Court building Lunglei sakna turin Trade & Commerce office awmna chu Law & Judicial department hnena hlan a remti a. Tun thlengin a hlawhtlinna hmuh tur a la awm lo thung. District Court building hi sak thuai a nih theih nan chinfel ngai chingfel turin kumin September 19 khan sawrkar hnenah an duhna an thlen a, September 22 thleng an nghah chhungin, an duh ang chhanna an hmu lo tih an sawi.
An duh ang chhanna an hmuh loh avangin hetiang hian hma an la a, a tul dan azirin an ti zel dawn tih an sawi a ni.
Mizoram sawrkara an thil phut zingah, District Court sakna tura cabinet-in a lo remtih tawh angin chak taka hma la turin an phut a; Court building sakna tura ruahman judicial office leh Trade & Commerce office building awmna chu pass hranpain landlease pakhatah sawrkarin siam rawh se, an ti.
Trade & Commerce building-a Zonal Geology & Mining Office dah thar chu a hma thei ang bera chhuahtir a, Judicial office atan sawrkarin kut thlak tan se, an ti bawk.
An thil phut a hlawhtlin hma chuan Lungleia ukil zawng zawngin court case an khawih dawn loa, documents (affidavit, deed, agreement, etc) an siam dawn loa, Notary Public leh bank hrang hrang panel lawyer-te pawhin legal paper engmah an khawih dawn lo tih an sawi a ni.