Covid len laia sum hmuh danah RTI leh House chhanna inanglo

Covid-19 len laia Mizoram sawrkarin tanpuina sum a hmuh dan leh centre atanga sum a hmuh tur a hmuh loh zat chu RTI-a zawhna chhan dan leh Assembly House-a zawhna chhan dan a inang lo tih MNF member Robert Romawia Royte chuan a sawi a. Finance changtu chief minister Lalduhoma chuan RTI chhan pek hnulama inchinfel lehna a awm vang a ni tih a sawi.
Assembly Session-ah finance changtu chief minister hian, hun pangngaia Mizoram sawrkarin central atanga sum a hmuh tura beisei, Covid-19 leng vanga a hmuh loh zat chu cheng vaibelchhe 2370.80 a ni tih a sawi a. Sum hmuhna tura ngaih, hmuh tak lohna a sawi danin, 2019- 2020 sawrkar kum chhungin Share of Taxes-ah vaibelchhe 867.39; 2020- 2021 chhungin Share of Taxes ah vbch. 957.41; 15th Finance Commission Special Grants-ah vbch.546 a ni.
Covid vanga Mizoramin sawrkar laipui tanpuina a dawn zat chu cheng vaibelchhe 90.63 a ni a. Heng bakah hian ‘For Management and Control of Covid” hnuaiah National Health Mission atangin grant engemawzat dawn niin, corporate social responsibility hnuaia sumfai leh bungraw dawn bakah Finance department-in a hriatpui loh engemawzat a awm tih chief minister hian a sawi a ni.
Zawhna neitu Robert Romawia Royte chuan, Covid len vanga Mizoram sawrkarin sum a hmuh tura a ngaih a hmuh tak loh hi tuna Assembly House-a chhan dan leh RTI hmanga Finance department-a zawhna chhan dan a inang lo tih a sawi a.
RTI hmanga zawhna Finance department-in 2022 August 19-a a chhan dan chuan, sum hmuh tura ngaih hmuh loh hi cheng nuai 2632.58 tih a ni a. Share of Taxes-ah 2020-2021 chhungin cheng nuai 1093.73 hmuh a ni tia chhan a nih thu a sawi bawk. “Tuna House-a chhanna nen a inang leh si lo a, a khawi emaw zawk zawk hi a dik lo a nih chuan a pawi hle,” a ti. Covid avanga sum hmu teuh anga sawi thin pawh a nih loh zia House-a chhanna atangin a lang tih a sawi bawk.
Chief minister chuan RTI-a chhanna pek hun lai aiin Accountant General atanga dawn final figure hnu ah a chiang lehzual a, chumi hmang chuan tuna House-a chhanna hi a lokal tih a sawi a. Covid laia sum hmuh tur ang hmuh loh leh thildang atanga hmuh hi Finance department kaltlang lo a tam avangin department-in a hriatpui vek lo a. Khatih laia an hriat theih chin hmangin an chhang nia a lan thu sawiin, an hriat loh te hriat belh zelin, a dik lo tih dik a awm zel a, tuna House-a chhanna hi a dik zawk a rinawm tih a sawi a ni.
Covid laia tanpuina dawn chu CM Relief Fund leh a hranpaa department danga lokal a thahnem hle tih sawiin, a thlawna damdawi in thar sakna tur leh hmanraw leina tur, thawktu lakbelh leh laboratory din belhna tur pawh a awm a. Zaa za central tum theih tura lehkha lokal chu minister a zawt a, a hriat pawh a lo hre loa, mahse register atangin an zawng hmu a, a hnu ah NHM-ah a haichhuak tih Lalduhona hian a sawi.
“A lawmawm tehlul nen, an lo dah mai mai a, hetiang lama tanpuina awm thei tur kha sawrkar khan a ngaihven vak lo niin a ngaih theih. A thlawna dawn tur tam kha an dawng thei lo a ni,” a ti.
Finance department-in a hriat chin chu tlemte a ni a, tanpuina hmuh hi department hrang hrangah tam tak a awm a, a kimchang taka hriat duh chuan department zawng zawng zawh a ngai dawn tih a sawi a ni.