Crop Insurance leh a behbawm

Crop Insurance Scheme – Pradhan Mantri Fasal Bima Yojana (MPFBY), 2025-26 chungchang nimina chief minister hova sawihonaah, loneituten crop insurance company hnena premium an pek tur thahnem tak sawrkarin tumsak ni se tih an rel a; loneitute zangkhaina tur ngaihtuah a ni hi a lawmawm hle.
MPFBY hi, ruahpui, thlipui, tuilian, rial tla, khawkheng, thlai natna hri, kangmei etc. avanga loneitute hlohna phuhrukna tura sawrkarin scheme a duan a ni a. Kum 2016-a hman tan tawh kha niin, kumin Feb 18 kha a kum 9-na a ni. Kum 9 kal ta chhung khan eng tiang chiahin nge Mizoram loneituten he scheme hi an lo tangkaipui tih hi mipui mimir hi chuan kan zuk hre ve si se lo te pawh a ni maithei.
Sawrkar laipui chuan MPFBY-ah hian kum 2025-26 chhung atan cheng vaibelchhia 69,515.71 a dah a. India hmarchhak bik tan chuan matching share hi 90:10 a ni leh dawn a ni.
MPFBY hnuaiah hian loneituten fur thlai cereals & pulses-ah 2% an pe ve ang a, commercial crop-ah 5% a ni ang. Thlasikah chuan cereals & pulses hi 1.5% leh commercial hi 5% a ni.
Chumi awmzia chu, entir nan: – insurance company hnena Premium pek tur hi Rs 1,00,000 lo ni ta se, fur thlai chingtu chuan Rs 2,000 (2% of Rs 1,00,000) a pe ve dawn tihna a ni.
Loneituten Rs 2,000 an pek hnuah a bak Rs 98,000 hi central leh state-in 90:10 in an intumsem dawn tihna a ni a. Chuti a nih chuan, Central sawrkar tum tur chu Rs 88,200 (90% of Rs 98,000) a ni ang a, State sawrkar chuan Rs 9,800 (10% of 98,000) a tum ve dawn tihna a ni. Tichuan, Insurance company hnena Central sawrkarin Premium a pek tur zat chu Rs 88,200, State-in Rs 9800, Loneituten Rs 2,000 tihna a lo ni ta a. Premium zat hi chu entirna mai a ni.
Mizoram sawrkar chuan loneituten Premium an pek tur chhawk zangkhai nan thahnem tak tumsak a tum thu a sawi a, ‘thahnem tak’ hi eng zat nge tih a la chiang lova, 90:10 te hi a pe (offer) ve thei mai ang em? Chu chu thahnem tak chu a ni phawt mai a; a lo thei lo ta a nih pawhin, eng zat pawh chu lo tumsak ta se, a lawmawm hrim hrim a ni.