Cup final-a Chelsea su tur Reds

Nilaini zanah 1-1-in mualneitu Fulham inhnehtawkpui ringawt mah se first leg-a 2-1 hnehna an lo chan tawh damkhaw-chhuahpuiin Liverpool chuan khelh hnih belhkhawma 3-2 hnehna nen Carabao Cup final an lut a, February ni 25 khian Wembley khelmualah Blues nen trophy an inchuh ang.
Craven Cottage-a inkhelah Luis Diaz chuan minute 11-na lekah Liverpool hmahruaina tilut bawk mah se second half laihawlah Issa Diop chuan Marco Silva team siphurh sutin, goal dang a luhbelh ta lo a, Anfield lama an lo chak tawh hlawkpuiin Jurgen Klopp-a team an tlang ta zawk a ni.
Cottagers khan extra time nghakchhuak thei turin goal thun theihna hun tha an hmu ngei a, mahse, Wilson-a long-range strike pui ve thawkhat tak kha Reds keeper Caoimhin Kelleher chuan a dansak hlauh a ni.
Inkhelh banah Liverpool manager Klopp chuan final a thlir a, Wembley stadium chhung chu blue and red hlirin a khat dawn tih a sawi.
Final lut ve dang Chelsea chuan Thawhlehni daih tawh khan first leg-a sikhat faia an ngam loh Championship club Middlesbrough chu 6-1 tehrenga sawpin Wembley ticket an lo hum thlan dup tawh a ni!
Premier League hmahruaitu ni mek Liverpool hian final tum 14 lutin League Cup final thleng zing record an kawl mek a, kum 2022-23 season hnu lamah erawh he tournament-ah hian an la champion leh tawh lo.
Klopp hian team thar din-chhuak ang maiin season kal laiah a team enkawl a chet-thatpui tluang rei ta viau a, nikum September ni 30 daih tawh Premier League match-a mualneitu Spurs an hneh loh tih loh kha tun season tualchhung inkhel bikah a team a la tlawmpui lo.
Tun season inelna hrang hrangah a starting line up a thlakdanglam sek a, mi 191 siksawi kual tawhin, Premier League club dangte aiin chet 56 zetin a thlak nasa a, chuti chunga an chetha tluang zel hian he team-in siksawi an dawlzia leh season kal laia an bulthut nghehzia a lantir awm e!
Fulham leh Anfield club hian tunkar tawp hian FA Cup fourth-round an khel zui ve ve dawn a, London club zawk hian Inrinni zanah Newcastle United an mikhual ang a, Pathianni zanah Liverpool-in Norwich City an mikhual ve bawk ang.