Lallunghnema
Charity Lodge
Cont: 9862288182
-- Advertisement --
Chibai ka buk a che u! Tukina kan thu leh hla hi customer-te hi dawrkai leh sumdawngte tan lal an ni tiin bul kan tan dawn a ni. Dawrtute tel lo chuan hralhtute hi an tâwp mai thin. Hetiang thufing hmu chhuaktu chanchin hi tawi tein kan zirho dawn a ni. John Wanamaker hi 1900 bawr vela US dawrkai, sumdawng hlawhtling tak a ni a. Amah hi sakhaw mi tak, vantlang rawngbawltu leh politician hlawhtling a ni bawk. Kum 1838 July-ah lo piangin July 1922-ah Philadelphia-ah a thi a ni. Wanamaker hi Marketing leh Advertising thiam em em, hawihhawm, dawhtheihna ngah, chapo miah lo, customer- te en thiam tak mî a ni. A eizawnna hlawhtlinna chu amah dawrtute an ni tih a hre chiang hle a. A be chhe ngai lo. Zaidam tak leh ngilnei takin a customer-te chu a lo ngaihsak thin a ni. Mizo dawrkai leh sumdawng zingah hetiang mi hi kan awm ve ang em? Customer-te lala pawm thei kan awm ve ang em? Thufing mawi tak, dik zik tluak tak chu LEITU AWM LOVIN A HRALH THEIH LOH tih hi a ni. John Wananamaker-te ang hi kan va mamawh em! Keini chuan customer-te kan hmusit thin a ni lawm ni? Kan lal hi i hai tawh lo hram ang u.
He kan chenna khawvel hi consumer issue-in a khat a. Eng lai pawhin consumer kan ni vek a. Mi zawng zawng consumer kan ni, kan tih hian a khaikhawm kim hle a ni. Tute pawh mi lian, mi te, rethei, hausate pawh consumer right thlirna tukverh atang chuan ang khat(equal) vek kan ni a. Consumer te hi mi tlem te an ni lo, mi tin kan ni tih hi pawm mai tur a ni. Heti fakauva mi zawng zawng consumer ni si, dikna leh chanvo pek ni si hi kan va ngaihsak lo ve? tih hi zawhna pawimawh tak a ni e.
Tun tumah hian consumer whatsApp group-a member thenkhatte thu khawchang kan ngaithla dawn a ni.
“Sawrkar leh dawrkaiah hian pawisa kan chawina reciept/ cash memo hi consumer chuan a la ngei ngei tur a ni. Chu reciept/cash memo chu kan pêkna chhan a fel hma chuan kan kawl tha tur a ni. A bikin sawrkarah te, company-ah te, thil tih fel hmaa kan tihbo chuan a buaithlak tawh thin a. Kan thiam loh a ni tlat si. Tui bill, electric bill leh thil dang bill awm chi te hi tun lai chuan Gpay-in an ti. Chutah i pêkna kha print out la, dah tha rawh.
Dawrkai vengva chuan,
Maximum Retailed Price a ngai
pawimawh a
Buk tling a ngai thu tak thin.
Bungraw chhia a zuar ngai lova
Bungraw tha leh hman tlak a zuar
zawk thin
Ei tlak, in tlak, hman tlak, thianghlim leh hrisel,
A zuarin a hralh thin.
Dawrkai vengva chuan
Customer satisfaction a ngai
pawimawh a,
Hawihhawm takin customer-te a
be thin.
“Ka lawm e,” tih chu a habit a ni a,
Chapona a ngai nêp a, tlâwmna erawh a chawi sang zawk thin.
Customer ngah leh neih tam chu
Hlawkna a ni tih a hriat avangin
a hawihhawm a
Biak a nuam hle thin.
Chutiang chu a ni.
Dawrkai vengva awm dan chu!
“Vai cooker siam inti te, vai puanthan rawn zuar te, mistiri inti te hi inchhunga siam ngai i siamtir a nih loh chuan in chhungah luhtir suh, anmahni vaite hian an luhtir ngai lo. Tin, Mizo pawh i hriat chian loh chu in chhungah luhtir mai mai loh a him ta. Fimkhur a va ngai em!
Dawrkai rinawm:
“Zion street chhuk thla bazar RL Store ball boot zawrhnaah vawiina ballboot leitute khan kan discount 1000 man kha cheng sangliin in lei e. A nghaktu thil lei hlana in lo pek avangin tihsual palh liau liau a ni. A cash-in in pek avangin kan hre tawh si lo che u a, khawngaiha post hi in lo hmu a nih chuan lo inhrilh hram turin kan ngen a che u…lo share zel teh u”.
An customer chuan a hriat chuan a lawm hle ang le. Hetiang dawrkai rinawm hi kan zawng mek a. Kan hmu zel bawk.
A tlangpuiin thil zuartute hian an bungraw zawrh lai man an tisang hle thin. Anmahni ngeiin an lei ngam loh tur khawpa sangin an chhiar thin. An thupui chu hlep tam, hralh tlem, hlep tlem hralh tam a ni. Dawn an har hle bawk. Anmahni pawhin an lei ngam loh tur khawpa sangin thil man an ti sang thin a nih hi! Thil lei thleng (return) leh an harsat hle bawk. Buk tling lo, hman tlak lo zawrh an ching. Mahse, mi rinawmten an ching ve lo. Mi felte hi mi fel loten an tihming chhe thin. Dawrkai rinawm leh vengva te hi kan chhuang zel dawn, consumer-te tan malsawmna an ni chhap e.
Dawrkai hlawhtling chuan customer a ngah thin a, an hlutna a hre chiang em em a ni. A customer-te chu a be chhe ngai lova, a chapo khum ngai hek lo.
‘Customer is King, ‘ tih a vawng reng a. Consumer satisfaction chu a thupui ber a ni thin. A hlauh ber chu customer-te huat thu sawi a niin dawrtu neih tlem chu a hlauh ber a ni thin.
Consumer-te u, huaisen hram teh u, hengte hi lo chhinchhiah ula. Ration buhfai hi zing dar 6:30—8:30 chhungin hawn tur a ni a Tlai lamah dar 3:30—5:30 chhung tih hi! Phur avanga nilenga hawn tur a ni law, duh duh dana sawngbawl tur a ni hek lo.
Hei hian tukin zinga kan article hi kan titawp dawn a ni-
* MRP, Weight of item, Quality & Standard, Expiry date, Date of manufacturing, ingredient, place of manufacturing ngai pawimawh ang che.
He article i chhiar hian i thlir dan min hrilh thei e.
Harsatna i neih chuan Centre For Consumer Education hriattir ang che. Inthlahrung suh!