CYMA leh agency lam inkawm

Central YMA chuan India ram chhung leh rampawna thalai hnathawk tur thawn chhuak thin, employment agency-te chu Nilaini khan kokhawmin, ramdanga hnathawka chhuakte harsatna tawh chungchang leh thawhho dan tur a sawipui.
Agency hrang hrang hian thalai hna thawk tura ramdanga an thawn chhuah dan kalhmang leh harsatna an tawhte an sawi a. Ramdanga hnathawka awmten harsatna an tawh dan pawh sawi a ni. Agency-te hian Mizoram sawrkarah district bawrhsap kaltlangin license an nei a, The Mizoram Private Placement Agencies (Regulation) Act 2015 hmangin hna an thawk thin.
Central YMA hruaitute chuan Mizo thalai engemawzatin ramdangah hna thawka an kal theihna tura agency-te hnathawh leh thalaiten eizawnna an nei thei chu lawmawm an tih rualin, rampawna hna thawk thalai harsatna tawkten an hnenah an thlen thin tih an sawi a. Agency-te chu document dik tak hmanga hnathawk tur thawn thin tur leh kum tlinglote thawn lo turin an ngen a; an thawn chhuahte pawh enzui zel tur leh an harsatna chinfel kawngah mawhphurhna la zel turin an chah.
Central YMA president Lalhmachhuana chuan thalai hlawhtling ngei tur leh rintlak chauh ram pawna hna thawk tur hian thawn thin a, fimkhur taka hma la turin agency-te hi a chah a. Thalai hna zawng lai, ramdanga thawk turte pawhin mahni nihna dik tak leh document dik chauh hmang turin a chah a ni.