Daine Warren-i’n Songwriters Hall of Fame 2024 Johnny Mercer Award dawng dawn

On Feb 24, 2024 9 0

Daine Warren-i’n Songwriters Hall of Fame 2024 Johnny Mercer Award dawng dawn
June ni 13-a Marriott Marquis Hotel, New York City-a Songwriters Hall of Fame Induction & Awards Gala-ah Daine Warren chu 2024 Johnny Mercer Award hlan a ni dawn. He award hi SHOF-in chawimawina a pek thin sang ber a ni a, songwriter emaw songwriting team emaw, SHOF a lakluh tawh te, an kutchhuak miten an ngaihhlut leh standard sang bik te hnenah hlan thin a ni.
Daine Warren hi hmeichhe zinga he award dawng thei palina a ni dawn a, Carole King (2002), Dolly Parton (2007) leh Carole Bayer Sager (2019) te hnung a zui ve dawn ta a ni. Anni bakah hian hmeichhe telna songwriting team he chawimawina dawng tawh hi pathum- Betty Comden & Adolph Green (1991), Alan & Marilyn Bergman (1997), leh Barry Mann & Cynthia Weil (2011) an awm tawh bawk.
Warren, kum 67, hian Grammy bakah Primetime Emmy leh Golden Globes pahnih a dawng tawh a, November 2022 khan Academy of Motion Pictures Arts & Sciences atangin Governors Award a dawng a, songwriter zinga he award dawng hmasa ber a ni bawk.
Warren hi Oscar history-ah best original song category-a vawi 15 chin nominate ni thei paruk zingah a tel a, tun kum sarih chhung phei chu he category-ah hian kumtin nominate a la ni ziah bawk a ni.
Warren hi Billboard Hot 100 chart-a top 10 kai thei hla 33 phuahtu zingah a hming a lang a, he chart top 10 a hla phuah lang thei hmasa ber chu 1983 ami ‘Solitaire’ kha niin, a tharlam ber chu nikum November-a chart top 10-a lang, Taylor Swift ‘Say Don’t Go (Taylor’s Version) [From the Vault]’ kha niin, he hla hi Swift leh Warren ten 2013-a ‘1989’ album atana an phuah dun niin, album-ah khan telh a ni ta lo a, mahse, ‘1989 (Taylor’s Version)’-ah an telh leh ta a ni. Heng a hla 33 chart top 10-a lang thei zinga pakua chu No.1 an kai a, chung zingah hian 1987-a hla hit zet mai “Nothing’s Gonna Stop Us Now” pawh kha a tel a ni.
Warren hi Songwriters Hall of Fame-ah 2001 khan lakluh a ni tawh a, hemi tuma an lakluh zingah hian Dolly Parton, Paul Williams, Willie Nelson leh Eric Clapton te pawh an tel a, Parton leh Williams te hi chuan Mercer Award hi an dawng taw nghe nghe a ni.
Warren chuan thuchhuah siamin, “Johnny Mercer Award ka dawng tur hi ka lawm takzet a, he chawimawina lo dawng tawh songwriter te hming han en hi chuan ka tan chawimawina vawrtawp a tling. Songwriters Hall of Fame-a lakluh ka nih khan ka nuin min telpui a, nitin ka nuam tih zawng ber ti chungin ei ka zawng thei tih min hriatthiam pui ve chiah. Tunah chuan ka pa nen van atangin hlim takin min rawn thlir tawh ang. Songwriters Hall of Fame chungah ka lawm e,” a ti.