Dam thei lo Nadal-a tawpna a lang ta ruak!

Kumin bak professional tennis huanga tel zui inring tawh lo Rafael Nadal chu a chawlh tum kumah pawh hliam avangin a la talbuai chho zel a, thla hmasa maiah a chipui Carlos Alcaraz nen exhibition match khel zuai mah se inelna hmachhawn thei tur zawngin a la fit chhuak zo lo a, Pathianni atanga khelh tan tawh tur Monte Carlo Masters hi an tinzawnpui leh rauh rauh laiin a taksa a la inpeihchhuah loh thu sawi chungin chawlh a la mamawh thu a sawi.
Kum 37 mi ni ve tawh Saniard hi hliam avanga kum khat dawn a chawlh hnuah kumin January thla khan Brisbane International khelin a rawn comeback zuai a, mahse, a khel bawr a tina zui leh a, kha mi tuma a hliam chhar thar leh avang khan Australian Open pawh hawisanin, tun thleng hian a la bawksawp zui ta zel a ni.
X-ah a dinhmun thar tarlangin, Nadal chuan a tana tournament khelh theih loh hrehawmzia chu midangte tana suangtuahpui thiam ngaihna awm lo khawp hial a nih thu a sawi.
Thla hmasa Indian Wells-a a inhnuhdawh hma leh Qatar Open-a a inlan theih loh hma kha chuan 22-time Grand Slam champion Nadal hian a thiamna mual clay leilunga khelh mi Monte Carlo-a kir hman kha a inbeisei viau a, tunah erawh a ki lak a dang ta daih a, “Ka hun tawn hi a harsa khawp mai a, vanduaithlaktakin, Monte Carlo lamah pawh ka inlan thei dawn lo tih puan a han ngai leh ta zel a, ka taksa hian inelna hmachhawn turin rem a la ti tlat lo a ni.
Thawkrim thin, nitin ka theihna sang ber nen kirleh tumin tan khawh bawk mah ila ka tana pawimawh em em tournament hmachhawn chu tihngaihna lam a awm lo a, vawiin hian ka la inkhel thei lo a ni.
“Tuna ka tih theih awmchhun chu ka dinhmun leh hun tawn pawm mai hi a ni a, hun tha zawk nghah leh phur taka ka inkhelh leh theih hun thlir mai loh chu tun dinhmunah tih theih ka nei lo,” a ti chuai raih!
Nikum May thla khan kum 19 chhunga a vawikhatna atan a ropuina French Open-ah Nadal a chhuak thei lo a, kha mi hnu lawk khan Nadal chuan kum 2024 hi a career-a kum hnuhnungber a nih theih tawh tur thuin tennis khawvel a barakhaih zui a, a dam theih loh dan enin kumin hi a chawlh kum a nih hmel tulh tulh a, khelmual chhunga ropui taka inlan chunga chawlh chu a beiseipuiawm ta chiah lo a ni!
Clay-court season bul a tan theih dawn tak lohah chuan May ni 20 atanga khelh tan tur Freh Open-ah pawh a tel theih a rinawm ta chiah lo a, Roland Garros title 15 lak tling chunga chawlh a beiseina pawh a thamral thei mai dawnin a lang ta!