Damdawi in atangin Mbappe a chhuak
Pum nuam lo chi khat (gastroenteritis) vanga damdawi ina hun rei vak lo enkawlna an pek zuai Real Madrid forward Kylian Mbappe chu Thawhlehni khan ifa Club World Cup khelhna hmunah a team-te rualin training a zawm ve lo a, a tuk, Nilainia Miami khuaa Al-Hilal nen 1-1-a an inhnehtawk tumin khelmualah hmuh tur a awm lo bawk a, Ningani khan Bernabeu club chuan thuchhuah siamin an forward ch u damdawi in lama dahluh a nih thu an puang ta nge nge a, hei hi Nilaini kha niin a hriat a, mahse, darkar rei vak lo hnuah hospital atanga a chhuah leh nghal thu an puang zui.
France captain hi damdawi in a chhuahsan hnuah Palm Beach hmuna Real Madrid training complex-ah a kir a, club thuchhuahin a tarlan zel danin, an player pum chiang lo chu damdawi hmanga vil chhunzawm a nih thu leh zawi muang deuh zawka team thiltihna a zawm chhoh tur thu an sawi.
US leilunga Fifa Club World Cup khelh mekah Real hian Arab team tihte mai mai an inhnehtawkpui a; naktuk, Pathianni hian Charlotte, NC lamah Mexican club Pachuca an hmachhawn leh dawn a, tah hian Mbappe an chhawr thei tawh dawn em a la chiang rih lo.
Gastroenteritis natna hi ril lam natna niin, luak leh kawthalo a thlen a; Mbappe hi Pachuca hmachhawn tura a dam fel hman ta lo a nih chuan June ni 26-a Real group game hnuhnungbera Salzburg an hmachhawn tur atan a inbuatsaih tawh mai a ngaih hmel.
Kum 26 mi Mbappe hian Paris St-Germain atanga free transfer-a Real a zawm hnu a season khatnaah inelna hrang hrang game 56 atangin goal 43 a khung tling a, France rama insiamrem hun chhung rei tak nghah ngai zawngin a khawsa lo!
Tun hi La Liga season tawp ruala chhuak ta Carlo Ancelotti thlaktu Xabi Alonso hoa Spanish giants-in competition an hmachhawn vawikhatna a ni.
Spanish football-a Frenchman Mbappe season hmasaberah khan Real hi Uefa Super Cup leh Fifa Intercontinental Cup-ah an champion.
Damdawi in atangin Mbappe a chhuak
Get real time updates directly on you device, subscribe now.
Next Post