Damdawia chiah thosilen sem dawn

A thlawna sem tur thosilen damdawia chiah, Long Lasting Insecticidal Nets (LLIN) chu Inrinni khan Health minister Lalrinpuii’n Aizawl atangin a vailiam.
LLIN thosilen hi malaria laka invenna atana Global Fund (Global Fund to Fight AIDS, Tuberculosis and Malaria) sum bultuma National Vector Borne Diseases Control Programme (NVBDCP) kaltlanga hmuh niin, Mizoram tan 414197 pek a ni.
Kumin March- April inkar hian Mizorama district 9-ah mipui hman theih tura sem zawh hman tum a ni. Khaw tinah niloin, malaria tamna khuaah sem a ni dawn.
Thosilen dawng tur khua chu kumkhat chhunga mi 1000 zel atanga chhuta malaria vei mi pakhat leh a aia tam awmna khuaa sem a ni dawn a. Size hrang pathum a awm a, chhungkaw member zat mil zela sem a ni ang.
He thosilen hi damdawia chiah sa a nih angin a damdawi that hun chhung hi kum thum a ni. LLIN hi kum 2016 khan sem a ni tawh a, a dawngtuten an hman that chuan Mizoramah malaria case a tlakhniam phah thin hle tih sawi a ni.
Mizoram hi malaria chenchilh ram a la ni a. Tun dinhmunah India ramah mi 1000 zel atanga malaria vei hmuhchhuah zat atanga chhutin malaria tamna ber state a ni mek. 2023 January – December chhung khan thisen exam zawng zawng zat 334100 atangin malaria vei hmuhchhuah 17988 an awm a, nunna chan mi 13 an awm.