Zirna in awmna atanga feet 300 bialah vaihlo leh a kaihhnawih reng reng zawrh khap a ni a, kum 18 hnuai lam hnenah vaihlo leh a kaihhnawih hralh khap a ni bawk. Hei hi Section 6 of The Cigarettes And Other Tobacco Products (Prohibition Of Advertisement And Regulation Of Trade And Commerce, Production, Supply And Distribution) Act, 2003-ah a awm.
Section 77 of The Juvenile Justice (Care and Protection of Children) Act, 2015-ah chuan, medical practitioner phalna lova kum tling lo hnena ruih theih thil (intoxicating liquor/narcotic drug/psychotropic substance) hralh/pek khap a ni bawk. Sec 6 of COTPA, 2003 bawhchhia hremna chu Rs 200 chawitir a ni a, Sec 77 of JJA, 2015 bawhchhia hremna chu kum 7 thleng lung in tantir leh cheng nuaikhat thleng chawitir a ni.
He khapna dan hi District Magistrate ten an chhuah thin a, tun hnaiah pawh Khawzawl District Magistrate chuan heng dan tlawhchhan hian order a tichhuak leh a.
Sec 6 of COTPA hian Aizawl khawpui chhung hmun thenkhatah chuan zawm a hlawh ve tan tawh a, mahse a tlangpuiin a zawm lo chu a tam zawk fê an la ni.
Section 77 of JJA pawh hian zawm a hlawh tehchiam lo a ni ang; khawi lai kawmkar emawah ruih nana thalaiten an hman thin damdawi bur ruak emaw damdawi mum kawr emaw hmuh tur a la tam em mai.
Damdawi zuar zingah, dan kalha thil ti duhte lo puitu an awm thin a, chumi ven nan chuan a ni ang, Shedule H leh Schedule X damdawi zawrhnaah CCTV dah vek tur tih thupek te pawh tihchhuah a ni leh tawh. Inven hi chu kan tum khawp mai, mahse invenna hmanrua changkang leh tha pui pui ruai thin mah ila, rilru (conscience) lam thunun hi a pawimawh ber a. Chumi dawta pawimawh leh hmasa ber chu dan kenkawh that a ni. Dan kengkawh tha chuang si lova thupek chhuah zur zut hian awmzia a nei tak tak lo. Dan chu a awm, dan hi thu a ni a, ‘thu tisaa chantir’ (law enforcement) lamah harhtharna kan mamawh a ni.
Dan a awm, mahse….
Get real time updates directly on you device, subscribe now.
Prev Post