JC.Zoremi Hmar Joute
-- Advertisement --
Kan hmâ lawkah furpuiin min lo hmuak leh ta reng mai. Ruah sûrin lung a lèn tlat thinte tan lung a leng nawn leh awn awn dawn a ni mai. Mahse kan Zoram nuam awih bakbahài lutuk hian furpui hi kan dâwl zo meuh lo thin a, chhiatna râpthlâk tak kan tawn thin tawh avangin, furpui hun nuam leh lung tiâwi mah ni se kan huphurh ru tûn thin tho va!
Chhiat rupna thlen thulh atana inven dan tur te kan hruaitu YMA leh sawrkar lamin dàn an zam lé lû a, bawlhhlawh paih dan chungchangah te dan mumal tak siamin an theih tawp an chhuah thin tih chu tu te pawhin kan haiin a rinawm loh. Tuihâwk luankawr tihfai te, sarâng leh bottle ruak thehthang dan turah te thahnem ngai em emin mipuite hnenah zirtirna an pe thin. Ram hmangaih lo bik nih duh miah si lova kan ram hruaitute thu zawm duh miah lo, lungmawl dàwn tawi hi kan tam ngawt nia. Chhiatna hian huam bik leh thlan bik a nei lo va, mi chunga thleng thei chu kan chungah pawh a thleng thei tih hria a, dàn siamtute thu awih mai hi khua leh tui tha nihna a ni ngai e.
Kohhran tinin dàn mumal tak kan nei vek bawk a. Kohhran dàn zawm chu tlàwma la tlat, kohhran hruaitute hmu râu lo tlat leh khawro tak anga ngai tlat tan chuan ‘pâwl chhuak’ nih a hnâi a, an hotute thuhnuaia kun an hreh luat avanga inbawl hrang ta pawh tam tak an awm rêng a ni. Pathianin kan chunga awm tura a ruat, ro fel tak min rêlsak tura a thlan chhuahte kan iai a nih chuan mahni inen fiah a ngai hlê tihna a ni. Kohhran atanga chhuak reng reng an tuihnâng zui teh chiam lo fo; a ziding zawk zui zel ila, hotute rorel dan leh min kaihhruai danah lawm taka Amen pêk mai hi tisa leh thlaraua damna a ni e.
Kan sawrkar hnathawkte pualin sawrkar laipui leh Mizoram sawrkar pawhin dàn fel tak a zam thlap a. Doctor emaw, Zirtirtu emaw pawh ni se thingtlanga awm hreh tlat an awm thin. Khawpuiah an awm vek sêng lo va, khawpui chauh hi hna thawhna hmun tur a ni lo bawk. Kan hnung deuh kan thlir chuan sawrkar hna thawk âi kal là an tam em em mai a. Khawpui chhung damdawi in leh school-ah te an inêkbeng tún a, thingtlang lam school leh damdawi in te, sawrkar office te a âwl hiai huai lawi si! Tunah erawh hei, kan sawrkar tharin khauh takin ro a rêl ta a, zawmthaw taka hna thawh te, âi kal lâk te a’n khap ta a, a thain a lawmawm tak zet a ni. Dik tak chuan thalai lehkha thiam tak tak, sawrkara hna hmu rih si lo hi tam tak an awm a, zelthel leh zawmthaw taka hna thawk thinte peih loh zawng zawng ti peih tur hi za tam an awm. An hna chelh an nihlawhpui teh reng nen, thawk tha peih lo hi chu sawrkar hian ren hauh suh se; an âi awh tur hi hla thu ang deuhin, ‘Sial ang an ngir khup’ a nia.
Mi kan changkang tawh a, Aizawl khawpuiah ngat phei chuan a maka maka tam lirthei nei kan awm tawh. Traffic rules bawhchhia hi tuk tin news-ah an puang dum dum reng a, an pawisa châwi tling khawm pawh a tam thin narawh e. Traffic dàn duangtute hian an hlâwkna tur emawa dàn hi zam an ni lo va, mipui kan him nan leh kan khawpui chêp lutuk kara felfai taka kan vei vah zung zung theih nana theihtawp chhuahtute an ni. Helmet i khum loh vanga an man che khan i pawisa an duh vang a ni lo va, accident tâwk palh ta la i himna tur a nih vanga man thin che an ni. Wrong side-a i tlàn vanga an man che khan i pawisa an ît vang ni lovin, accident i tawh palh an hlauh vang tho a ni. Him dam taka khawpui chhunga kan len vel theih nan traffic dàn hi i zawm hram hram ang u.
Ramsa kan nih ngawt loh chuan, mihring kan nih ve si chuan kan dam chhungin dàn hnuaia lêng tur kan ni tih hi kan pawm tur a ni. Dàn mumal tak nei lo pâwl chu a ding rei thei lo va, hna ziktluak a thawk thei hek lo. In chhungah pawh pa ber emaw. hotu berin chhungkaw dàn mumal tak a vawn tlat a, chhungkaw member ten kan zawm that bawk chuan chhungkaw awhawm leh zahawm kan ni mai thin. Naupang enkawlnaah emaw, chhungkaw inrelbawlna thilah upa ber zai ngaia awm a, kan zah thiam leh thu kan awih zel a tul a, chhungkaw member pakhat lek vangin chhungkuain kan mualpho thei a, kan tan rual avang pawhin chhungkaw zahawm kan din thei a ni tih hi i theihnghilh hauh suh ang u.