Darkar 24 chhunga pull-up titam thei record siam

Japan a cheng Kenta Adachi chuan darkar 24 chhunga pull up vawi 8,940 tiin, Guinness World Records, darkar 24 chhunga pull up titam thei ber record a siam a, chu chu a hmaa record siamtu Australian Gary Llyod record aiin vawi 300 chuangin a tam zawk a ni.
Kenta hi pull up lama record siamah hian a mikhual tawh bik lo a, 2022 khan chawlh awm miah lovin pull up vawi 651 niin, a zawna pull up tihnem thei ber record a lo siam tawh bawk a ni.
2007 khan Kenta hi Japan Coast Guard-ah a thawk ve tan a, chuta sports test an neihah chuan pull up-ah a tichhe hle mai a, chuta tang chuan pull up a uar tar ta a. Ama tawka a pull up record a chhinchiah dan chuan June 2015-ah vawi 80 a ti thei a, March 2016-ah vawi 100 a ti thei tawh a, February 2021-ah 102, April 2021-ah 110, June 2021-ah 221, September 2021-ah 430 a kai ta zawk mai a, 2022-ah chuan record a siam ta a ni.
2022-ah a zawna pull up titam thei record a siam hnuah darkar 24 chhunga pull up ti tam thei record siam tumin a inpuahchah leh nghal a, mahse, record siam tuma a inpuahchahnaah amah leh amah inenchhin nan tiin, darkar 9 leh minute 32 chhungin pull up vawi 5,000 a tichhin, chu chuan amah inrintawkna a neihtir viau nain a banpuam dinglam a tina ta deuh tlat mai a, a inenkawl dam leh te te a ngai ta a ni.