Dawt hmanga BJP bei lo turin Lalsawta chah

MPCC president Lalsawta chu thu diklo hmanga BJP bei foah BJP Mizoram chuan puhin, Kristian ze dik tak leh Mizo ze dik tak hmanga vote zawng turin an ngen tih an sawi.
BJP Mizoram thuchhuak chuan, MPCC president leh a thawhpuite chu Mizo mipui ngaihtuahna hruaisual thei zawnga thu thehdarh a, dawt hmanga BJP bei tawh lo tur leh vote zawng lo turin an ngen tih a sawi a. National-a an hotupa Rahul Gandhi-a’n Paris-a zirlaite leh academicians hmaa BJP leh Hinduism chungchang a sawi chu hrechianga zirchiang ve turin an chah.
‘Rahul Gandhi chuan, BJP chet dan leh Hindu sakhua hian engmah inlaichinna leh inzawmna an nei lo. BJP thil tih danah hian Hinduism leh Hindu-na engmah a awm lo a; Hindu nationalist-a BJP puhna hi thu phuahchawp, belhchian dawl lo a ni, tia a khawvel hriata a puan mek lai a, mipui bum tuma BJP an beihna hi Mizoram Congress hian bansanin Mizoram hmasawnna hna thawh tur ruahmanna an nei a nih chuan chutiang hmanga party dang bei zawk turin kan chah a ni,’ a ti.
BJP-in India rama PM Modi hoa kum 9 chhunga sawrkarna a chan atanga a hnathawh ber leh an thil tum chu, chak taka India siam leh ram hmasawn bera siam a ni, tiin, BJP hnathawh that chu Mizoram pawhin a takin kan chang mek tih sawiin, ‘MPCC president hian BJP leh Pu Modi a fak hreh a ni pawhin, central-a an hotupa Rahul Gandhi thusawi atang tal hi chuan harh chhuak hram se, tih hi kan beiseina a ni. Dawt phuahchawp avanga Mizoten kum kha leh chen kan lo tawrh tawhna kha a tawk hle tawh a, Mizoram Congress party hian mipui bum hi duhtawk tawh se, Mizoram hmangaihna tak tak nen ram politics vei ve tawh turin kan chah a ni,’ a ti.