Dawt sawi tawh lo turin Congress hruaitute chah

Congress hruaitu zingah ZPM -in BJP atanga tanpuina sum dawng anga sawi a awm leh thin chu an ngaimawh a, dawt sawi tawh lo turin an duh tih ZPM Thalai chuan an sawi.
ZPM Thalai Hqrs. thuchhuak chuan, Congress party hotute’n ZPM-in BJP atanga tanpuina dawng anga sawia mipui rilru hrua kawi tuma aw an la chhuah reng chu pawi a tih thu a sawi a. Congress senior vice president Pu Lal Thanzara bakah Congress MLA Pu C Ngunlianchunga ten ZPM-in BJP atanga tanpuina dawnga ngaih theih tura thu an sawi zel chu sim tawh se an duh tih a sawi.
‘MLA inthlanpuiah he inbeihna hmanga ZPM min beihna kha mipuiah awmzia a nei loa, vote an hmuh tam phah lo tih hmuthiam turin kan chah a. Congress party inthlan a hnai a, a mimal ang pawhin theihtawp chhuah hunlai a ni tih kan hriatthiampui a, chutihrual chuan politics kalphung hluia dawt hmang inbeih bansan a, thudik auchhuahpui tawh turin kan ngen a ni,’ a ti.