Dawt sawia inpuh
SASCI sum lapse chungchangah ZPM leh MNF chuan a titu-ah an inpuhtawn a, debate neih te an rawt a. Chutih mek laiin, SASCI sum lapse chungchangah bawk dawt sawia inpuhna a lo ri chhuak leh ta a.
May 14-a Lawngtlaia MNF Thalai Hqrs., MNF Thalai Sub Hqrs. Lunglei, MNF Thalai District Hqrs MADC, LADC leh CADC hruaitute thukhawm thuchhuak chuan, chief minister Lalduhoma’n an sawrkar tirha press conference a neihah SASCI sum chu single nodal agency (SNA) a dah vek tawh angin dawt a sawi a, SASCI sum a sawi hi SNA account-ah kumin May 8 thleng khan dahchhuah a la ni lo a, K.Deposit-ah Finance department-in a la kawl tang reng, an ti a. May 3-a CM-in press conference a neihah 2022-2023 kuma cheng nuai 40,000 sanction atanga nuai 20,000 lapse anga a sawi chu dawt a ni, tiin, ‘Nuai 40,000 hi sawrkar laipuiin a release kim vek a. Hna nuai 40,000 man thawh niin, bill pawh pek a ni,’ an ti bawk.
Khawthlang ramah khuan tunhmaa cowboy hun lai khan, dawt sawia inpuh chu ‘i silai chuh rawh’ intihna tlukah an ngai thin. Dawt sawia inpuh chu, a puhtuin engkim huamin a hmachhawn a, dawt sawia puh tan pawh mahni zahawmna hum nana nun thapa lo beih let loh chu tihtur dang a awm tawh lo. Chutiang khawp chuan dawt sawia inpuh hi chu an la ‘serious’ a, engkim tawpna a ni deuh ber mai. Dawt sawia puha khan a bei let ngam lo a nih chuan, a dawihzep vang a nih loh vek leh, puh a nih angin dawt a sawi tihna a ni thei a; miin êk tlukah pawh an ngai lo zui mai thin.
Hei hi tunhmaa khawthlang rama thil thlen dan a ni. Tunah hian dawt sawia inpuhna lo ri chhuak hi, khawthlang ramah ni lovin khawchhak ramah a ni a, khawthlang ram culture leh khawchhak ram culture chu a inang chuang lo tih kan hre awm e.
Politics-a inbeihnaah hian tawngkam dengkhawng tak tak hriat tur hi a awm thin a. Tun tum chu court-ah thubuai pu lutin an inchapchar ngei ang, tia mipui lamin an lo thlir laiin, a dik zawk leh dik lo zawk hriat theih si lohvin a zuzi ral leh a. A lehlam a dik zawk ang, dik lo zawk ang ti mai maiin mipui lam an inhnial zui a, a tawpah ‘a tawp’ hlen leh mai thin. Hei hi politician-ten mipui an bawlna a ni deuh ber awm e.
Sawrkarna chelh mektu ZPM party-in an vauchher ber chu dikna leh rinawmna a ni. Chu chu mipui hlui an duh a, an tum a, tun hi mipui hnena DIKNA an hailanna tur hun remchang tak a ni. Sawrkarna chelh mektu party hian, dawt sawia inpuhna lehthalin, mipui hnenah thudik tak an hailang thei dawn em tih chu mipuiin an thlir ber tur ni tain a lang.