DDK Aizawl hotu Lawngtlaiah

Doordarshan Kendra (DDK) Aizawl director (News) Nampibou Marinmai chuan April 26 khan Lawngtlai tlawhin, DC leh SP a kawm.
DDK Aizawl director (N) hian Lawngtlai district bawrhsap Cheemala Siva Gopal Reddy hmu in, dan leh thupek kenkawh leh inrelbawlna kawng hrang hranga an district dinhmun an sawidun a. DDK hotu chuan Lawngtlai district-a DDK hnuaia thawktuten thu pawimawh an lakkhawmna kawngah a tul anga kaihruai a, thawhpui tur leh inlaichinna tha neihpui turin bawrhsap hi a ngen.
Lawngtlai superintendent of police R Lokeshwaran pawh hmuin, venhimna kaihhnawiha an district dinhmun a sawipui a. DDK director chuan social media-ah thuthang dik lo leh mipui tichiai thei thehdarh awm thin chu a pawi hle tih sawiin, DDK kaltlangin thu belhchian dawl chauh tihchhuah thin a ni a, chumi atan chuan DDK thawktuten hriat duh pawimawh an neih changa inhawng taka lo chhawn thin turin SP hi a ngen a ni.
DDK hotu hi Lawngtlai DIPRO C Lalhruaitluanga leh Lawngtlai district-a DDK stringer-ten an tawiawm a. Lawngtlai Vengpuia Doordarshan Low Power Transmitter TV Relay Centre hluihlawn tawh chu tlawhin, mipui tana tangkai zawka hman theih dan tur kawng zawn a tum tih a sawi. Lawngtlai daia Kanaan Refugee Camp a tlawh bakah Mizoram Upa Pawl (MUP) District Hqrs hruaitute nen Lawngtlaia Community Radio Station din theih dan tur an sawi ho bawk.