Delhi police ten Kejriwal insawifiah turin ti

Delhi police te chuan Chief Minister Arvind Kejriwal chu BJP ten AAP MLA te Rs 25 crore theuh peka Aaam Aadmi Party chhuahsan turin an thlem tia puhna chu finfiahna pe turin an hriattir.
Arvind Kejriwal chu Thawhtanni hian finfiahna pe ngei turin hriattirna an pe a ni.
Kejriwal chuan BJP te chuan Delhi Liquor Police case-a manah vauin hei mai bakah hian AAP MLA 21 te an bia a, an zinga pasarih te chu AAP chhuahsana Rs 25 crore theuh pek an tiam a ni tiin a sawi a.
BJP te chuan engmah pawisak nei lovin Delhi a AAP sorkar chu a theih dan ang zawng zawnga paihthlak an tum a ni, tiin Kejriwal chuan a sawi bawk a.
“Tun hnaiah BJP ten kan Delhi MLA pasarih te biain – Kejriwal hi ni reilote hnuah kan man dawn a. Chumi hnuah MLA te kan tidarh ang a, MLA 21 te kan be mek reng tawh a ni, midang pawh kan be zel ang a, chumi hnuah Delhi-a Aam Aadmi Party hi kan tithlu ang. Min zawm ula, Rs 25 crore kan pe ang che u a, BJP ticket-in in ding bawk ang an ti” tiin Kejriwal chuan X ah a post a ni.
Chief Minister chuan Delhi ah AAP sorkar a chetthat em avangin a theih dan zawng zawnga tihnghin an tum a ni a ti bawk a. Delhi mipuite chuan AAP an duh si a, BJP te tan inthlanah hneh ngaihna a awm lo a ni a ti bawk.
Delhi Police te chuan Kejriwal chenna in Zirtawpni khan an pan a, notice pek an tum a, mahse an lo dawng duh lo.
Inrinni khan Delhi Chief Minister chenna an pan leh a, chuta official lo awm te hnenah hriattirna chu an hlan ta a. Delhi Minister Atishi pawh notice an pek zingah a tel bawk.