Democracy chawinun nge, mipui zalenna rahbehna tur – Lal Thanzara
Lok Sabha inthlanpui kan hmachhawn mek chu ram leh mipui tan mai niloin, India ram pum leh mipui tan a pawimawh takzet a. Democracy chawinunin a awm dawn nge mipui zalenna rahbeha awmin mimal thuneihna (autocracy) hnuaiah kan lut dawn tih a hril dawn tih Congress president Lal Thanzara chuan a sawi.
MPCC president hian Narendra Modi kaihhruai NDA sawrkar chuan mipui zalenna chanvo (right to freedom) nasa taka rapbetin sawrkar laipui institution pawimawh – CBI, Enforcement Directorate, Income Tax Department leh a dang ho hmangsualin, mipui vantlang leh an lam tang lo political party leh hotute harsatna siamsakna hmanruaah a hmang nasa a. Mipui zalenna rahbehna hmanruaa heng sawrkar institution hmansual hi NDA sawrkar hnuaiah a zual zel tih a sawi.
NDA sawrkarin kum 10 kalta chhunga sakhaw zalenna nasa taka a rahbeh sak leh a zual zel dan a taka hmutute chu kohhran ho leh Mission field-a thawkte an ni tih a sawi bawk.
“Mipui zalenna chanvo kan neih hi BJP kaihhruai NDA sawrkar hnuaiah tam tak lak bo sak kan ni tawh a, lak bo mek zel a ni. India rama dan hremi (lawyer) lar ber zing ami Prashant Bhushant chuan 2024 Lok Sabha inthlanah NDA sawrkar thlantlin leh a nih chuan Indian danpui hnuaia Fundamental Rights kan neihte tihboin a awm ang, a ti hial a. Union Finance minister ni mek Nirmala Sitharaman pasal, academician hmingthang Parakala Prabhakar pawhin Prime minister Modi thlantlin leh a nih chuan Indian danpui tihdanglam a ni anga, Lok Sabha inthlan kan neih leh theih pawh a rinawm loh, a ti a ni,” a ti.
MP inthlan tur chu MNF leh Congress emaw ZPM leh Congress emaw lam ni loin, sakhaw zalenna humhim zel duhte leh nuai bo duhtute inbeihna a ni tih Lal Thanzara hian sawiin, “Kan ram, hnam leh kan sakhaw him nan central-a BJP kaihhruai NDA sawrkar hi paihthlak a ngai a. Chumi atan chuan Mizoram mipuiin tih tur leh tih theih kan nei. Central-a BJP thawhpui a, an tha tichaktu tur MP thlang loa, BJP tha chhata kan ram, hnam leh sakhua humhim tura nghet leh huai taka ding tur Congress MP candidate thlantlin a ni,” a ti.