Denver Nuggets in Bucks an hneh

Thawhleh zinga NBA regular season khelhah champion lai Denver Nuggets chuan awlsam takin Milwuakee Bucks an hneh. Inkhel hmuhnawm takah Oklahoma City Thunder chuan Minnesota Timberwolves an hneh ve bawk.
Champion lai Denver Nuggets hian head coach thar Doc Rivers nena inlan Bucks lakah bul an tan tha tawk lova, quarter hmasa berah point khatin hnufual zawkah an tang. Quarter hnihnaah team hnihte an inhneh-tawk chhunzawm viau a, point an inluh chhawk zak zak hnuin Denver chu point khatin an chung-nung zawk ve thung a. Chungnung zawk awm thei lovin chawlhlawk an hmang.
Chawlhlawk hnu lamah pawh an inhneh-tawk zui viau a, champion laiin quarter thumnaa an khelh that an chhawr tangkai.. Nuggets hi quarter thumnaah point sarih an chungnung a. Quarter hnuhnung berah point khatin hnufual zawk ni bawk mah se point 113-107 in hnehna an chang zui ta tho a ni.
Bucks an hneh tum hian Denver tan Nikola Jokic a che tha leh viau a, point 26 thawkchhuakin ball sawhlet vawi 10 a dawn bakah assist vawi 12 zet a nei bawk a. Season kal meka a vawi 14 nan treple-double a puitlin. Jokic hian NBA regular season-ah treple-double vawi 119 zet a puitlin tawh a, NBA chanchinah treple-double ngah palina a ni mek.
Thawhleh zing hian Western Conference-a table chung lam luahtu pahnih Oklahoma City Thunder leh Minnesota Timberwolves te an inhmachhawn a. Pathumna luah mektu Thunder in point 107-101 in hnehna an chang. Oklahoma City Thunder tan hian Shai Gilgeous-Alexander chuan point 37 a thawkchhuak.