DEO-in polling station tlawh

Serchhip district election officer, bawrhsap David Lalthantluanga DC chuan Nilaini khan an district huamchhung khua – Vanchengte, Sialhau, Thentlang, Rullam, Lungpho leh Ngentiang a tlawh a. Heng khuaa polling station hmunhma enfiahin, Lok Sabha inthlanpui atan hman tlak ngei a nih leh nih loh a enfiah. Booth level officer-te kawmin mamawh an neih leh an hmalakna a sawipui a ni.
Election Commission of India (ECI) in polling station tina awm ngei tura a bituk – a panna kawng mumal tak, kawlphetha leh tui thianghlim in tur hnianghnar, mipa leh hmeichhe inthiarna, ramp, furniture mamawh ho, mobile connectivity leh telephone (landline) a awm em tih leh venhimna chungchanga ruahmanna awmte a enfiah a ni.
Polling station atan hian middle school leh primary school-te ruat a ni a. DEO hian Vanchengte Middle School, Sialhau Govt. Middle School, Thentlang Primary School, Rullam Govt. Middle School, Lungpho Govt. Middle School leh Ngentiang Govt. Middle School te a tlawh. Lungphoah zan riakin vawiin hian Thinglian, Hmunzawl leh Keitum a tlawh leh ang.