Dhurandhar 2-in ni 5 chhungin vbc 800 la lut

Dhurandhar 2-in ni 5 chhungin vbc 800 la lut
Bollywood film hit zet mai Dhurandhar: The Revenge chuan an cinema hall-a an chhuah tan atanga ni 5 chhungin ticket hralhna atangin cheng vaibelchhe 800 chuang a la lut hman a, chung zinga vaibelchhe 600 chu India-a a lak luh a ni. He film hi March ni 19 khan an tlangzarh a, a film hmasa zawk ‘Dhurandhar’ chu December 2025 khan an tlangzarh tawh a, cinema hall lamah a chetha hle a, a chhunzawmna pawh a original aimahin a rawn chetha chhunzawm ta a ni.
Dhurandhar: The Revenge hian India-ah Thawhtanni thleng khan cheng vaibelchhe 619.76 la lut tawhin, India ram pawnah pawh a chetha hle a, cheng vaibelchhe 210 a la lut tling tawh bawka, tihian khawvel huapin cheng vaibelchhe 829.76 a la lut tling ta a ni.
Dhurandhar 2 hi Hindi tawng mai bakah Kannada, Malayalam, Tamil leh Telegu a tihchhuah a ni a, Hindi film hi a sum hmuhna lian ber niin, Telegu-in a dawt. A film hmasa nikum December-a an tlangzarh-ah khan Ranveer Singh chu a changtupa niin, Akshaye Khanna chu misual niin, India-ah cheng vaibelchhe 1,007.85 la lutin, India ram pawnah cheng vaibelchhe 299.50 a la lut bawk a, khawvel huapa a lak luh hi cheng vaibelchhe 1,307.35 a tling.
A film chhunzawmna ‘Dhurandhar: The Revenge’-ah hian Ranveer Singh bawk chang lehin, Indian spy, a ruka Pakistan a chetla lemah a chang leh a, a film hmasaa Lyari gang a phin darh dan leh an hotupa Rehman Dikait a thah dan vel tarlan a ni a, a part 2-ah hian Pakistan-a Lyari a thuhnuaia a dah chhunzawm dan leh politics lam thil tlengin tarlan a ni.
Dhurandhar 2-ah hian Ranveer baka Sanjay Dutt, Rakesh Bedi, R. Madhavan, Sara Arjun, Arjun Rampal te pawh an inlan a, a film director Aditya Dhar nupui, Yami Gautam pawh a inlan ve zuai bawk.