Diakkawn hnehtu Bungkawn nulate

Set hloh hmasa zawk an nih hnuah Bungkawnin tha takin an beilet a, karliamta Zirtawpni zan Ather Pro Volleyball League-ah set li set khatin Diakkawn an hneh.
LPS Arena, Falkland-ah Diakkawnin awlsam takin set khatna la mah se F. Lalparmawii leh Chinlunkimi’n kawng dikah Bungkawn hruai kirin 8-15, 15-13, 15-12 15-8, 15-6-in an chak.
League an khelh hmasak berah set li set khatin Luangmual lakah Bungkawn tlawm mah se an insiamthar a, khelh hnihah league point nga hmuin a sang pali zingah an tel a, Serkawn an nih rual.
Vawihnih final lut tawh Bungkawnin a tumkhatna’na champion an tumna kawngah rahbi thar an tuk a, F-i’n point 19 hlawhchhuakin tum li a hloh a, Kuriz Player of the Match lawmman a dawng.
Set thumna atanga chetha Kimi’n point li tho hlohin tum 13 a vaw tla a, player dang hlawk thama point hmu awm lo mah se Bungkawn an inrem fuh a, an hmabak atan inrintawk thar an insiam tel nghal bawk.
Vawithum an khelhah tum hnih Diakkawn tlawm mah se point an thawkchhuak ziah a, league point riat kawlin table-ah an sang ber a, anni aia vawi khata khel tlem Luangmualin point sarih hmu tawhin pahnihnaah an awm rih a ni.
Veteran Vardingliani’n point 15 hmuin point sarih a hloh a; captain Lalmuanpuii’n tum dang a phak lo a, vawisarih vaw tlain point nga a paih.
An khelh hnuhnun berah Diakkawnin set thum set hnihin champion lai Luangmual an hneh lo a; Bungkawn hmaah chak ngei tura rin hlawh khawpin bul an tan fuh.
Muani’n a vuak tlak hnuah Bungkawnin VL Hmangaihzuali service an la thei lo zui leh a, 12-8-in an sang. A hnuah Dingi’n point hnih hmu zawnin set la turin point khat neih belh an mamawh a, Bungkawn spiker Rody Lalzuiliani’n ti sualin an tlang.
Set hnihnaah an inhnehtawk zui hle a, 11-11 a nih laiin F-i’n nam tlain Melody Lallawmkim’n a service atangin point a hlawh chhuak zui a, 13-11-in Bungkawn an sang.
Diakkawnin nawrletin 13-13 ni leh mah se F-i vaw tlain point hloh tawh lovin Aizawl team an tlang a ni.
Inkhel boruak a nung thar a, Bungkawn coach Lalhmingliani Sailo chuan an khelh dan tidanglam hretin rinrawl atan Kimi a hmang a, a hma aia hriamin an inlan.
Set thumnaah 14-11-a sang zawk an nih hnuah Diakkawn tan R. Malsawmtluangi’n vaw tla mah se derthawng zui loin Bungkawn an tlang a; set hnuhnung pahnihah Kimi’n langsar takin a khel a, a hlap tla tam a, set linnaah point sarihin an inthlau a, set nganaah 10-1-in Kolasib team-in an um phak lo a ni.
May ni 8 zanah Bungkawnin rin hlawh zawk ni chungin Durtlang an khelhpui leh dawn a; Diakkawnin league khelh khat an la nei a, ni 10 hun awl an neih hnu May ni 13 zanah Durtlang an hmachhawn dawn a ni.