District 4-ah industrial complex

Building pakhata industrial unit hrang hrang awm theihna, ‘Flatted Factory Complex’ Mizoram district palia dinna tur chu Thawhlehni khan Industrial Growth Complex Luangmual-ah Commerce & Industries minister Dr R Lalthangliana’n lungphum a phum.
Aizawl, Lunglei, Champhai leh Kolasiba flatted factory complex sak tur hi Commerce & Industries department hnuaia kalpui tum a ni a. Sawrkar laipui Ministry of MSME atanga sum hmuh hmanga din tur niin, IGC Luangmual Aizawl, IIDC Pukpui Lunglei, IIDC Zote Champhai leh DIC Complex Kolasib ah complex hi sak tum a ni.
Aizawl atan hian cheng vaibelchhe 9.9845 ruahman a ni a; Lunglei tan vbch. 9.9796, Champhai tan vbch. 9.9336, Kolasib tan vbch. 14.9900 a ni. Heng complex-ah hian type I, II, III leh IV sakna tur hmun ruahman lawk niin, space ruahman hi a vaiin 113 a ni. Aizawl leh Kolasib tan bik hian weigh bridge, transformer leh solar street light a kengtel dawn a ni.
Minister chuan he project kaltlang hian miin awlsam zawkin industry an din theih phah tur thu leh industry din thar duhten building leh hmunhma buatsaihna atana sum tam tak an sen ngai thin chu a chhawk zangkhai dawn tih a sawi Flatted factory complex dinna tur sum hmuh hi sawrkar laipuii zaa 90 tumin, state sawrkarin zaa 10-in a lo dolet dawn tih a sawi.
“Industry lama hmasawn turin road map mumal tak siam a pawimawh a. IGC hi tangkai zawka chhawr thiam a pawimawh a; tun ami hi a tawpna niloin, nasa zawka industry hmanga sum lakluh a, economy chawikang turin department leh a thawhpuite bakah entrepreneur-ten ngaihtuahna seng zel ang u,” Dr R Lalthangliana hian a ti.