District Court tan ram pek let leh building sak phutna thlawp

District Court Lunglei building sakna tura sawrkarin ram a lo pek fel tawh, tunhnaia chhuhsak leh chu pelet leh a, building hi sa thuai turin sawrkar an phut tih Congress party chuan an sawi.
Lunglei District Congress Committee thuchhuak chuan, Mizoram Bar Association (MBA) Sub Hqrs Lungleiin District Court building tur hmunhma chungchanga sawrkar laka lunglawilohna a lantir chu a thlawp a, a rang thei ang berin an harsatna leh an thil phut hi tih hlawhtlin sak nise an duh tih a sawi.
Cabinet meeting-in a remtih tawh leh cabinet meeting thuchhuak bawhzuia Trade & Commerce minister Dr R Lalthangliana, Law & Judicial minister TJ Lalnuntluanga leh sawrkar hotu dang thukhawm ten Trade & Commerce building Lunglei chu judicial office atana remtia an inhlanfel vek tawh hnuah minister Dr R Lalthangliana hian kumin September 2 khan judicial office lamin mahni ta anga an lo cheibawl tawh chu Zonal Geology & Mining office atan a rawn hawng tih a sawi.
Geology & Mining department-in office tha tak an neih an duhsak rualin, sawrkarin hei aia hmun rem leh tha zawk ngaihtuah sak se, tuna judicial office atana a pek tawh hi a neitu diktak ten tangkai taka an hman theih nan hma la thuai turin sawrkar an phut tih LDCC chuan sawiin, ‘District Court Lunglei hi mipui tana pawimawh leh a tel loa kan awm theih loh a ni a, tunah hmun chep takah thawktu leh ukil-te an inkhungkhawm a. Tun aia changtlung leh tha zawka hmunhma sak thuai a nih theih nan sawrkar kan phut a ni,’ a ti.