District Plan siamna atan vbch.1

District Plan siamna atan vbch.1
District Catalytic Intervention Plan Fund chu Thawhtanni khan chief minister Lalduhoma’n a sem a. Mizorama district tin chu an District Plan a taka an kalpuina tur cheng vaibelchhe khat theuh pek an ni.
Tunhmain District Planning Committee din ni tawh thin mah se, an district plan a taka an kalpuina tur fund pek an ni ngai loa, an ruahmanna a takin an kalpui thei thin lo tih chief minister hian a sawi a. District-ten hma an sawnna tura anmahni’n plan an nei leh chumi ti hlawhtling tura sum pek theih chu sawrkarin a duh a. Tuna an sem hi a bul tanna niin, Bana Kaih scheme tihhlawhtlinna pakhat a ni tih a sawi
A enzui kawngah bawrhsap-te thuneihna sang tak pek an nih bakah project proposal pawh anmahni bultuma siam a ni, tiin, “He fund a hlawhtlin theihnan hian mawhphruhna pawimawh tak an chelh a. A bul kan tan anga, kan hman that viau chuan a dang pawh la pek chhuah zel theih tura duan a ni a. Hna a chhe tur a ni lo,” Lalduhoma hian a ti.
District bawrhsap ho aiawhin Aizawl bawrhsap Er Lalhriatpuia chuan thu a sawi a. District tin project neih chu Mizoram District Transformation Programme zulzuiin an kalpui a. Scheme dang nena kaikawp (convergence) zawnga kal an awm bawk tih a sawi. Sawrkarin hetianga hmalakna tur fund a pe chu an phur hle tih a sawi bawk.
He fund hi Handholding Scheme component 5-na, Decentralised Plan hnuaia pek an ni a, an sum dawn zaa 10 hi admin fund atana hman theih a ni ang. An thawh that dan azira pek belh zel tur a ni.