Wimbledon 2024 khelh mekah dam chiang lo chunga inlan Novak Djokovic chuan thawhleh zan khan bul a tan a, Vit Kopriva lakah harsatna tawk lovin a chak. Inkhel dangah Britain rawlthar Jack Draper chuan harsa takin first round a paltlang ve thung.
Grand Slam-ah vawi 24 zet champion tawh Djokovic hi French Open 2024-ah hliamin a tibuai a, quarter-final khel thei lovin a inhnukdawk. A khup hliam vang hian Wimbledon a hmachhawn thei dawn em tih a chiang lo reng a. Inelna a hmachhawn thei dawn em tih chiang lo chungin London a pan a, khup tuamna vuah chungin inelna a hmachhawn ta a, a khel thei ta fu a, set hloh lovin a chak.
Damkawr chunga inelna hmachhawn Djokovic hian tha takin bul a tan a, set khatnaah break a nei zawn a, game khat chauh hloh chungin set a la. Set hnihna leh set thumnaah pawh a khel tha chhunzawm viau a, set hnuhnung pahnihah hian game hnih ve ve chiah a loh zui leh a, 6-1, 6-2, 6-2 a hnehna changin second round a lut. Wimbledon-ah Roger Federer champion zat vawi riat champion tuma tan khawh mek Djokovic hian second-ah British wildcard Jacob Fearnley a hmachhawn zui leh ang. Djokovic hmaa ding tur Fearney hian Wimbledon a khelh hmasak berah a khingpui Alejandro Moro Canas chu 7-5, 6-4, 7-6(12) in a hneh.
Wimbledon champion hlui Andy Murray chu mimal inelna hmachhawn lovin a inhnukdawn. Murray hmunruak hi British rawlthar Jack Draper-a’n hnawhkhatin, hnehna a chang zui nghal. British mipa no 1 Drapper hian Swedish qualifier Elias Ymer a hmachhawn a, harsa takin hnehna a chang. Drapper hian set a hloh hmasak zet hnuin set hnih a la zawn a, set lina a hloh leh hnuin deciding set-ah break a neih a chhawr tangkai a, 3-6 6-3 6-3 4-6 6-3 a hnehna changin first round a paltlang.
Drapper chak rual hian tualchhung tlangval Cameron Norrie pawhin hnehna changin second round a lut ve bawk. 2022-ah semi-final lo thleng tawh Norrie hian a khingpui Facundo Diaz chu 7-5 7-5 6-3 in a hneh.
Djokovic a chak awlsam
Get real time updates directly on you device, subscribe now.
Prev Post