Djokovic a tlawm leh tawh

Tennis player zinga ropui ber ang hiala ngaih Novak Djokovic tan 2024 hi kum tha lo a ni a, champion na a la nei lo. Monte Carlo Masters-ah champion tumin tan khawh mah se semi-final a paltlang zo lo leh a, Casper Ruud hneh lovin a tlawm. Djokovic rual hian World No. 2 Jannik Sinner chu Stefanos Tsitsipas hneh lovin a tlawm ve bawk.
2024 a chetha lo Novak Djokovic hian Monte Carlo Masters semi-final-ah Caspere Ruud a hmachhawn a, No 10 Ruud lakah bul a tan tha lo. Set khatnaah an inhnehtawk viau a, game an inlakchhawk zak zak hnuin Ruud-a’n break pawimawh tak a nei a, he a break neih hmang hian game li hloh chungin set khatna a la.
Set khatna a hloh hnuin set hnihnaah a insiamtha a, a khel tha ta hle. A khingpui lakah break a nei zawn a, Serb hian game khat chiah hloh chungin set a la. Set khat ve ve an lak hnuin chak tura rin zawk ni mah se Djokovic a chesual nawn leh. Deciding set-ah hian an inhnehtawk leh viau a, game an inlakchhawk leh zak zak hnuin Ruud-a’n beak pawimawh tak nei lehin set a la nawn leh a. Champion tura rinkai Djokovic lakah hian 6-4, 1-6, 6-4 in hnehna a chang a, final a lut.
Grand Slam-ah vawi 24 zet champion tawh Djokovic hian kum 2024-ah champion na a la nei lo teh tlat a, vawi 14 hnehna a chan tawh laiin tlawm zawkah vawi li lai a tang tawh. Kum bul tan tha lo viau mah se a vanneih hun a thlen thuai a beisei tlat thung a. May thla hian a trophy kawl mek humhim turin French Open a hmachhawn ang.
Djokovic a chak loh rual hian tunlaia khel tha tak Jannik Sinner pawh semi-final paltlang zo lovin a tla ve bawk. Sinners hian semi-final-ah Stefanos Tsitsipas a hmachhawn a, Greek tlangval lakah hian set khat la ve bawk mah se, 4-6, 6-3, 4-6 in tlawm zawkah a tang a, final a lut zo lo.
Djokovic hnehtu Casper Ruud leh Sinner hnehtu Stefenos Tsitsipas te hian nizan khan final an khel a, result kan tarlang hman lo.