Donald Trump thah tumin bei
Pathianni khan US president Donald Trump chu Palm Beach, Florida-a a golf course ah thah tum a ni tiin thuneitute chuan an sawi a. Trump thah tumtu hi Hawaii a cheng kum 58-a upa Ryan Wesley Routh nia sawi a ni.
Golf course a Trump vengtu Secret Service te chuan hnim kara silai kaw hmawr an hmu a.
Secret service agent te chuan silai kap puak nghalin silai neitu chuan a AK-47 style rifle, a backpack pahnih leh Go Pro camera chu thlauhin a Nissan car-in a tlanchhiatsan nghal a ni.
Palm Beach County sheriff Ric Bradshaw chuan a bul hnaia mita lo hmutute chuan silai kengtu car chu a license plate thla an lo laksak hman hlauh tiin a sawi a.
A hnu lawkah sheriff deputy te chuan thenawm lawk Martin County-ah rinhlelh pa chu Interstate 95-ah lo tidingin main custody ah an dah nghal a ni.
Reuters te chuan Ryan Rotuh X, Facebook leh LinkedIn profiel an enfiahnaah Trump kah tuma chet a lak hma lawk darkar khat velah Facebook leh X profiles te chu remove a ni tih an finfiah zui a.
Routh hminga account pathum awmah chuan Ukraine leh Russia indona kal mekah Ukraine thlawp bur a nihna a lang fiah hle bawk.
April 12 khan Routh chuan X ah Elon Musk hriattura message a ziahah, “I hnen atangin rocket lei ka duh a ni. Putin a Black sea mantion bunker kah nan ka hmang duh a, a man zat min hrilh thei em” tiin a ziak a ni.
NewYork Times te chuan kum 2023 khan Ukraine indonaa Americans volunteer te kaihhnawihah Routh chu an lo interview tawh thu an sawi bawk a. Routh chuan Times hnenah kum 2022 khan Ukraine ah zinin thla eng emaw zah chamin Afghan sipai Taliban chhuahsan te chu Ukraine tana raldo tura lak tumin theihtawp a chhuah thu a sawi a ni.
Kum 2020-ah khan X ah bawk Routh chuan Democractic US presidential candidate Bernie Sanders chu a thlawp thu sawiin Biden chu ‘sleepy Joe’ tiin a nuihsawh bawk.
Kumin kumtir lamah pawh X a post a siamah Routh chuan Biden tag in, “@POTUS i campaign in KADAF. Kepp America democratic and free a ni tur a ni. Trump campaign chu MASA Make Americans slaves again master a ni ang. DEMOCRACY ballot ah a awm mek a, kan hloh thiang lo” tiin a sawi bawk.
Thla hnih vel kalta khan Donald trump chu Butler, Pennsylvaniaa rally a neihnaah kahhlum tuma lo ni tawh a. Silai hmehpuah hman niin Trump-a beng veilam hliamin a hnunga amah thlawptu pakhatin hliam tuarin pakhatin nunna a lo chan phah tawh bawk.
Tun tumah erawh Trump chu kah hman a ni lo va. Thil thlen hnu lawkah Trump chuan thuchhuah siamin, “Kan in leh a chhehvelah silai hmehpuah a ni a, thuthang mak deuh deuh a leng nghal mek a. Ka sawi duh chu Ka him a, ka tha e” tiin a sawi.
White House chuan President Joe Biden leh Vice-President Kamala Harris te chu thil awm dan hrilh hriat nghal an nih thu leh Trump a him avanga an lawm thu an sawi thu a tarlang nghal a.
“Vawiina President Trump thah tumna hian min tibuai takzet a ni” tiin Kamala Harris chuan thuchhuah siamin a sawi zui nghal bawk.
Bipartisan congressional task force te chuan 13 July a Pennsylvania a Trump thah tumna chhui chiangtute chuan Trump a him chu lawmawm an tih thu sawiin mahse political violence thleng fo chu an duh lo takzet tiin an sawi nghal bawk a.
Republican congressman Mike Kelly leh Democratic Jason Crow te chuan Secret Service te hnen atangin thil thleng dan leh engtiangin nge an beihzui dan hrilhfiah turin an ti nghal bawk a.
Secret Service hotu Rafael Barros chuan a hma pawhin Presidnent Donald Trump chu thah tum a nih tawh avangin fimkhur takin engkim an kalpui thu a sawi bawk.