Down Syndrome-te chibai buk

Down Syndrome-te chibai buk
March 21 kha World Down Syndrome Day 2026 a ni a. He ni pual hian Down Syndrome nei leh anmahni enkawltute duhsakna chibai buk an ni.
Chief minister Lalduhoma chuan, Down Syndrome Day-ah hian Down Syndrome-te leh hmangaih taka anmahni enkawltute zawng zawng chibai a buk tih a sawi a. An tana theihtawp chhuah reng thin Mizoram Down Syndrome Association chungah lawmthu a sawi thu a sawi bawk. “Down Syndrome-te hian kaihruaitu leh zirtirtu tha an neih phawt chuan engkim an ti ve thei vek a. Duat takin enkawl zel ang u,” a ti.
Health & Family Welfare minister Lalrinpuii pawhin Mizoram-a Down Syndrome-te chibai a buk tih sawiin, an talent, an ngilneihna leh an thil thlir dan danglam tak chuan khawvel chu hmun tha zawkah a siam thin tih a sawi a ni.
Mizoram Synod moderator Rev. John Raldosanga chuan, he Ni hi Down Syndrome-te tan malsawmna ni turin a duhsak tih a sawi a. Mizoten kan chhungkua leh kan chhehvela Down Syndrome awmte hmusit leh endawng mai loin, anmahnni ngaihsak a, anmahniah Pathian ropuina puanchhuahna atan hman theih a ni tih hre thar turin a chah. Down Syndrome zawng zawngte dinhmun ngaihtuah chungin kohhran pawhin amahni Pathian ropuina puanchhuahna atan leh anmahni lamah rawngbawlna zauh zel a pawimawh tih sawiin, “An tih theih loh ringawt hriatsak loin, an tih theih lam hriatsak a, chanvo kan pek pawh a ngai a ni. An nun chhung atan mi pawimawh kan ni tih hria ila, damchhung hun thawnthu ngaihnawm siamsaktu ni turin tan la zel ang u,” a ti.
Down syndrome hi genetic disorder a ni a, tih dam theih loh a ni. Mihringten kan taksaa ti mur (cells) tam tak kan neih chhungah chromosome tuak 23, a vaiin 46 a awm a. Down syndrome neite hi chuan an chromosome 23-naah tuak niloin pathum an nei a, a vaiin chromosome 47 an nei ta tihna a ni. Hei hian an pianphung hmel lan dan a ti danglam a, an taksa leh rilru lam hmasawnna thlengin a ti chak lo thin.
Hemi ni hian mawza inang lo bun thin a ni a, hei hian an danglamna hi a mawi tih a entir. Microscope-a chromosome lan dan hi mawza nen a inang avangin mawza hi ‘symbol’ atan hman a ni.
Kumin thupui atan “Together againts loneliness” (Tangruala khawharna dolet) tih hman a ni a. Mithiamte zirchiannaah rilru lama rual ban lo zingah khawharna, mal riaua inhriatna a awm thin tih sawi a ni a, chu chu hriselna lam thlenga nghawng thei a nih avangin khawharna leh mal riaua inhriatna an neih lohna tura tangrual turin khawtlang mipui leh kohhran mipui ngen an ni.
World Down Syndrome Day hi chromosome 47 neite an danglamna avanga en hrang loa, midangte anga zalenna an neih a, anmahni lawmna ni a lo nih theihna atana duan a ni.