Drone hmangin US sipai pahnih tihlum

Syria ramri bul Jordan ramria US base chu drone hmanga beih a nih avangin US sipai pathumin nunna an chan.
US President Joe Biden chuan ‘radical Iran thlawp militant group’ te thiltih a ni tia sawiin, “Kan chhang let ngei ang” tiin a sawi bawk a. Iran chuan inrawlhna a nei lo tiin a sawi ve thung.
Tun hi 7 October, 2023 a Hamas tena Israel an beih hnua helai biala indona a chhuah hnua US sipai tena nunna an chan hmasak ber a ni a.
Jordan chuan drone hmanga beihna chu Syria ram chhung tia sawiin Jordan ram chhung a ni lo a ti thung.
A hma pawhin helai region-a US base-te chuan beih a tawk fo tawh a, mahse tun tum chauh hi nunna chan awmna a ni tiin US military chuan a sawi a. Tu te tih nge hriatchian theih a la ni lo.
President Biden chuan US chuan kan duh dan ang thlapin mawhphurtute chu hrem an ni ngei ang tiin a sawi a. Iran chuan US leh British tena militant group-te a thlawp anga an puhna chu a hma lawkin a hnawl thu a sawi bawk.
“Heng inpuhnate hi political goal nei thlap niin helai region dinhmun dik tak let thawk a ni” tiin foreign ministry spokesman Nasser Kanaani chuan a sawi niin Tehran official IRNA news agency chuan a tarlang.
White House chuan Biden chu US sipai tena beih an tawh chungchang hi UD Defence Secretay Lloyd Austin leh official dangte chuan an hrilh hre nghal tiin a sawi.
“Jill nen kan sipai nunna chan chhungte leh thiante kan tawrhpui takzet a. Ram puma American-te chuan heng kan pasalthate thihna hi kan sunin kan tuar a ni” tiin Biden chuan thuchhuah a siamah a tarlang.
Nunna chante hming leh hliamte hming tarlan a la ni lo thung a. South Carolina-a tlawhnaah Biden chuan, “Middle East-ah zan hrehawm tak kan tawk a. Mi huaisen pathum kan chan a ni” tiin a sawi bawk.
US official-te chuan military personnel 34 lai chu brain injury nei thei an awm tiin hmun himah an thiar nghal thu sawiin sipai thenkhatte hliam tuarnate pawh hmunpui panpui an ni an ti bawk.
Drone hian chenna quarter a den fuh avangin chuvang chuan hliam pawh an tam phah nia sawi a ni.
US Central Command leh President Biden-te chuan northern Jordan, Syrian border bul US official tena Tower 22 an tih an hmun chu beih tawk chu a nih thu an sawi zui bawk.
Mahse Jordanian orkar thupuangtu Muhammad Moubaideen thung chuan state TV kaltlangin drone chuan Syria-a al-Tanf base zawk a bei tiin a sawi thung.
Nikum December thla khan US official-te chuan Iraq leh Syria-a US base-te chu 17 October hnu khan tum 97 beih a tawk tawh tiin an sawi.
Thla kalta khan US chuan US sipai pathumte drone hmanga hliam an nih hnuah Iran-affiliated group-te lakah airstrike a kalpui a, tun thla tir lam khan US chuan US sipaite beitu ber nia ngaih militia leader chu Baghdad-ah a tihlum bawk.
ABC News tena an kawmnaah Chairman of the Joint Chiefs of Staff Gen CQ brown chuan America thil tum ber chu ‘buaina darhzau tir loh’ tiin a sawi a ni.
“Kan tum chu che thei lova siam niin buaina nasa zawk a irhchhuah kan remti lo va, helai region pum a kangkai loh chu kan tum a ni” tiin a sawi.
US leh caoalition group dangte chu Iran thlawp Houthis tena commercial ship an beih vak vak hnuah Red Sea-ah an inbun bawk a. Yemen-a inbun Houthis-te chuan Gaza-a indona chhuak mekah Hamas-te an thlawpna lantir nana lawngte chu bei an nih thu an sawi.
United States chuan ‘heng dan kalha chetnate hi Gaza nen inkungkaihna pakhat mah a awm lo’ a ti thung a. “Houthis-te hian Red Sea chu lawngte bitumin an pawng kah a, khawvel ram 40 chuang a nghawng a ni” tiin Centcom chuan a sawi.