Dubai leh housemaid behbawm…

Nikum atang tawhin Dubai leh housemaid kan la ti chho reng a. Hemi chungchangah hian puhmawh tur a tam tual tual a, felfai leh rintlak zawka thil kalpui a ngai tih a lang chiang hle.
Mi faten dan ang thlapa felfai taka an hlawkpui theih tawh laiin, ‘private placement agency ten an ngaihsak zui lo’ tih velah kan la tâng leih leih a. A sawrkar ber pawhin dan a siam laiin a lo ngaihtuah ngun tawk lo niawm tak a ni a, ‘The Mizoram Private Placement Agencies Regulation Act, 2015’ hnuaia Regulation section 2 leh 8 ah, mi an thawnchhuah theihna hmun tarlan ‘Mizoram pawn’ tihin khawvel a huap thei tih velah kan let leh a.
Mizoram sawrkar hnuaia dan pakhatah ‘Mizoram pawn’ tih a lo chuan avanga India ram pela inthawn chhuah theih ang thawhthanga kan ngai a, khawvel ram dangte pawhin ihe lova Mizoram dan siam chu lo pawm ve zung zung tur anga ngaih theiha a kaikuang ber anga ‘Dan’ kan kawhrawn hi a dik ziktluakin a rinawm loh. Mizoram pawna thawnchhuahte hian India ramchhuahsan turin khu lamah khuan sut tlang tur bang chhah tak an la hmachhawn dawn chauh a, dan ang thlap lo deuhva India ram chhuahsan an nih thin vanga an awmna rama zuk buai ta chiam thin an nih dan atang hian a lang chiang reng mai a ni.
A kaikuang ber chu, sawrkar a ni lo thei lo. Lehkhathiam hna hmu lo an tam em em a, lehkha zir sâng lo hna hmu lo pawh an tam em em a, heng zawng zawng hi sawrkar chuan a ngaihtuah tur a ni a, chu chu mipui sawrkar a awm chhan pawh a ni. Chutih laiin, hna thawh tur hmuh loh vang ngawta sawrkar dem a, ‘ba thin taka thin tluk tluk’ tur tihna erawh a ni hran lovang.
Thil kan la varpawh ve chiah loh, state dang or khawvelin, felfai taka an lo kalpui theih tawhte hi a zirchiang tur kan intir chhuak thin a. Mi state-in bawlhhlawh an sawngbawl dan te, mau an sawngbawl dan te, organic thlai an sawngbawl dan te, sangha an khawi dan te, ruahtui an khawlkhawm dan te, oil palm an sawngbawl dan te, khawvel ram dangin tlangram an hman tangkai dan te, etc.. a tam mai.
Tuna kan buai luai luaina job placement chungchangah pawh hian, India rama state dangin an lo kalpui dan hi zirchian ve mai a finthlak ang a. India ramah chuan Kerala khu he lamah hian an lo harhvang hmasa a. Tunah phei chuan ram danga hna thawk thalai an chhuah hnem avangin coconut lo tur an inhmu mang tawh lova, coconut a tam tehlul nen, a to hle ringawt mai. Ram danga hnathawka chhuakte khuan Kerala state economy an chawikang nasa; eng vang nge kan tih chuan, ram danga hna thawka chhuak turte buaipui tur liau liau government undertaking ODEPC an nei alawm.
Hetiang deuha kalpui law law hi keini pawhin kan thatpui a rinawm.