Durtlang leh Republic te an chak

LBS Suzuki 22nd CYMA Football 2025 chu Thawhlehni khan RG Stadium-ah khelh chhunzawm niin quarter-final khelh zawh a ni a, Durtlang leh Republic ten hnehna changin semi-final an lut. Durtlang leh Republic te hi semi-final ah intumin, final luh an inchuh zui leh dawn.
Thawhlehnia inkhel hmasa zawkah Durtlang leh Kawnpui Vengtharte an inhmachhawn a, inkhel hmuhnawm takah 2-2 in an inhnehtawk. Hun pangaiah chak zawk an awm theih loh hnuin Durtlang hi penalty shhoot-out ah vannei zawk an ni a, 3-0 ngawta hnehna changin semi-final an lut.
Inelna neih meka khel tha tluang tak Kawnpui Vengthar hian Durtlang lakah bul an tan tha a, chawlhlawk hmain goal hnih an thun hman. Goal hnih an thun hmasak bakah Durtlang player pawimawh Ricky Lallawmawma hnawhchhuah a lo ni bawk nen Kawnpu Vengthar hian final an hnaih hman hle. Hnufual zawk ni reng mah se Durtlangin champion tlak an nihzia an lantir a, tlem zawk ni chungin an si phurh an sut zo thei. Hun pangngaiah chak zo bik lo mah se Durtlang hi tie-break ah an vannei ta zawk a ni.
Final luh ngei tuma tan khawh Kawnpui Vengthar tan hian R Lalzuitluanga chuan minute 15-na lekah hmahruaina goal a thun. Hma takah goal an thun vangin an phur viau a, chawlhlawk dawn hnaih hun tlemte pek belhah Vanlalhriatpuia chuan Kawnpui Vengthar goal hnihna thun zui leh a, 2-0 a hmahruai chungin chawlhlawk an hmang.
Chawlhlawk hmain khel tha lo mah se, chawlhlawk hnu lamah Durtlang an khel tha viau thung. Second half tan tirh lam minute 51-na lekah Lalchungnunga chuan goal thunin an si phurh a sut. An si phurh an sut then vangin phur viau mah se Durtlang an phur rei lo. Minute 52-naah an defender pawimawh Ricky Lallawmawma hnawhchhuah a ni. Si phur zawk an nih bakah an defender pawimawh Ricky-a hnawhchhuah a nih vangin Durlang dinhmun a chhe hman hle. Dinhmun harsa taka an ding hi an huaisenzia tilang chiangtu a ni ta hlauh thung. Huaisen takin an khingpuite an nawr let char char a, Lalfelkima chuan minute 73-naah goal thunin an si phurh a sut.
Goal hnih ve ve an thun hnuin inkhel a hmuhnawm zui viau a, goal thun tumin innawr tawn nasa viau mah se goal dang a luh belh thei tawh lova, hun pangngaiah chak zawk an awm thei lo. Hun pangngaiah chak zawk an awm thei lova, minute 30 dang an khelh belh leh pawhin chak zawk an awm thei chuang lova, penalty shoot-out hmangin semi-final lut tur zawk tihchian a ni. Penalty shoot-out ah hian Durtlangin 3-0 ngawtin hnehna an chang ta mai a, phu takin semi-final an lut zui ta a ni.
Sialhawk an tla
Durtlang leh Kawnpui Vengtharin inkhel hmuhnawm an lantir hnuin quarter-final hnuhnung berah Republic leh Sialhawk an inhmachhawn ve thung. Football thiam khua Sialhawk hian player lar Laldanmawia hmangin goal hnih thun bawk mah se an chakpui zo lova, penalty shoot-out ah vanduai zui lehin semi-final lut zo lovin an tla a, CYMA Football 2025 atangin an puanthuah an tel.
Player lar leh tlo Laldanmawia’n Republic lakah player tha bik a nihzia a lantir a, minute 20-naah hmahruaina goal a thun a, minute 31-naah penalty pet goal in a goal hnihna a thun zui leh. YMA Football a vawi khat champion tawh leh inelna neih meka champion tura rinkai Republic lakah si hniha hma an hruai vangin Sialhawk an phur viau a, final lut turin an dinhmun a tha hman hle nghe nghe.
Quarter-final an luh thlenga goal la chhuah lo Republic in goal hnih an chhuah zawn vangin fiahna hautak zawk an hmachhawn a, si phur hmasa zawk an nih vangin team huaisen an nih leh nih loh fiahin a awm. Fiahna an hmachhawn zawng zawngte tha takin a paltlang vek a, an khingpuite lehthlain semi-final an lut zui ta a ni.
Republic tan hian Lalnunzira chuan minute 35-naah penalty atanga goal thunin an si phurh a sut a. Minute 65-naah VL Krosschhuangzela Ralte chuan goal thunin an si phurh a sut zo. Goal hnih ve ve an thun hnuin goal thun belh thei an awm tawh lova, penalty Shoot-out hmangin chak zawk zawn chhunzawm a ni a. Penalty shoot-out ah hian 5-4 in Republic in hnehna an chang a, Durtlang laka fiahna hautak hmachhawn zui leh turin semi-final an lut.
Semi-final ah Durtlang leh Rupublic an intum ang a. Armed Veng South leh Bethlehem Vengthlang an intum ve dawn bawk. Semi-final hmuhnawm tak a nih ngei a rinawm.