Durtlang tlawmtu Serkawn nulate

A vawikhatna’n Serkawn an chak a, Thawhtanni zan Ather Pro Volleyball League-ah Durtlang harsatna tipungin set nga faiin an hneh.
LPS Arena, Falkland-ah R. Laltleipuii (Tetei) leh Elisian Medai chuan Lunglei team tan point 28 an thawkchhuak a, 15-7, 15-13, 15-5, 15-12, 15-6-in an chak.
League bul an tannaah set khat mah la lovin anni ang bawka kaithar Diakkawn lakah Serkawn an tlawm nghal. Durtlang hmaah kawng dikah kirin captain Tetei’n point 15 hmuin tum nga a tisual a, Kuriz Player of the Match-a thlan a ni.
Durtlangin nikum khan hma lam hun thlir chungin player naupang rual an chhawr a, chak an nei lo. Kuminah an player-te an la puitling tawk lo a, tawnhriat nei leh fa nei tawh Lalramengi Ralte hoin khel mah se kum nga chhunga a vawikhatna’n Pro Volleyball inkhela chak an tumna an puitlin thei lo.
Kum 2019 final-ah Bungkawn hnehin Durtlang an champion a, hemi hnu hian chak an nei zui tawh lo. Kum 2022-ah vawithum khelin, kum 2023-ah tum nga an inlan a, khelh kua an tlawm zawnna a ni.
Diakkawn nen an inkhelh tumin Serkawn player-te an ngampa tawk lo a, Durtlang hmaah inringtawk takin bul an tan a, Tetei’n a vuak tlak rualin set hmasa berah 10-7-in hma an hru ai a, point nga hmu zawn zuiin an tlang.
Durtlang tan Sarah Lalsuiengi chuan vawi nga tisualin point kua a hmu a, mimala thawhhlawk ber niin set hnihnaah team tan beiseina a siamsak a, a vuak tlak hnuah 13-12-in sang hman mah se ball hlap tla tura danglamna siam thei player an tlachham a, an tuar.
Set la tura point hnih an la mamawh laiin Lalrampani’n tum hnih a vaw sual zawn a; Emily Lalramsangi’n line pawnah hlap chhuak bawkin hun pawimawhah harsatna an tawk a, anmahni tihsual vangin Serkawnin set an la zawn.
Lunglei team-in derthawng zui tawh loin inkhel an thunun tluan a, a tha thei ang berin league point nga an hmu.
Elisian chuan tum 13 vaw tlain point sarih paih mah se Tetei nen team an chawikang a, Evelyn Malsawmtluangi’n point ruk a thawhchhuah chanve a hloh bawk.
Durtlang hmabak a hautak dawn a, Sarah-i bakah Maengi’n tum nga hlap tlain vawi thum a tisual a, anni pahnih bak hlawkpui thama khel an awm lo. An el theih tur team lakah set an la thawkchhuak ve lo a, karleh Thawhtanni zanah an khel leh dawn a, champion lai Luangmual nen an intawng ang.
Serkawnin semi-final beiseina an insiam ve thung. May ni 10-ah an inlan leh chauh dawn a, title humhim thei tura rin hlawh Luangmual hmaah fiahna leh chona nasa zawk an hmachhawn dawn a ni.