EAM S. Jaishankar-in Singapore tlawh
External Affairs Minister S Jaishankar chuan Singapore tlawh mekin Zirtawpni zing khan Trade and Industry Minister Gan Kim Yong nen an inkawm.
Minister pahnihte inkawm hian ram pahnih te inkar-a inlaichinna thar leh hun rei tak daih tur an sawi dun nia thu dawn a ni. India leh Singapore te hian, hun rei tawh tak atanga inlaichinna an lo neih tawh chu, kum 2015 khan mumal zawkin an thar thawh leh a. Ministry of External Affairs (MEA) thu chhuah tarlan danin, kum 2023-a India President-na hnuaia G20 ministerial level summit neih a nih khan Singapore chu summit chhim tura sawm a nih angin a tel ve thu leh India nen inkawmna tha tak an neih thu a chhuah a ni. Jaishankara’n Singapore a tlawh chhung hian Singapore Foreign Minister leh an hotu pawimawh ber ber te a hmu nghal ang a, Indian Heads of Mission te intawhkhawmnaah kaihruaitu a ni nghal bawk dawn a ni.
S Jaishankar chuan Ningani-a ASEAN leh East Asia-a India Ambassador te intawhkhawmnaah kaihhruaina hna a lo thawk tawh bawk a, “Kan ngaihtuah ber chu ASEAN ram te hmasawn dan leh India ram tana nghawng a neih dan hi a ni a. Ram hrang hranga kan ambassadors thurawn min pekte hi India-in policy tha tak a neih phahna hmanraw hlu tak a ni,” tiin Jaishankar chuan Twitter kal tlangin a sawi a ni. India leh Singapore te inlaichinna langsar zual zingah chuan thil hlu hrang hrang inpek tawn te, economic dinhmun inchawikansak tawn te leh ram pahnihte ngaih pawimawh zawng inhriatthiampui tawn te a ni a. Ram pahnihte chu ram hrang hrang inzawm khawm zingah member ni dun zelin chung zingah chuan – East Asia Summit te, G20 te, Commonwealth te, Indian Ocean Rim Association (IORA) leh Indian Ocean Naval Symposium (IONS) te an ni.
Kumin February thla khan Reserve Bank of India Governor Shaktikanta Das chuan Singapore hi lo tlawh tawhin Singapore Monetary Authority Managing Director Ravi Menon chuan India leh Singapore te awlsam zawk nan India’s UPI leh Singapore’s PayNow chu ram pahnihte Prime Minister Narendra Modi leh Lee Hsien Loong te awm laiin hawn a lo ni tawh a ni.