ECI hotuten Aizawl thutchilh mek

Mizorama inthlan inbuatsaihna kalpui mek thlithlaiin chief election commissioner Rajiv Kumar leh election commissioner pahnih – Anup Chandra Panday leh Arun Goel, senior deputy election commissioner Nitesh Vyas, deputy election commissioner pahnih – Hirdesh Kumar leh RK Gupta bakah ECI official 12 chuan Thawhlehni khan Aizawl an thleng a, ni thum an cham ang.India danpui article 324 -in a tarlan angin, state inthlanpuia thuneihna pumhlum neitu chu Election Commission of India (ECI) a ni a. Kumin December 17 hian tuna 8th Mizoram Legislative Assembly term hi a tawp dawn avangin, inthlan hmachhawn dan tur inbuatsaihna kalpui mek an endik dawn a ni.
Ruahman lawk angin ECI full commission hian larsap Dr Hari Babu Kambhampati chu Raj Bhavan-a an hmuh hnu ah Aijal Club-ah national & state recognised political party aiawh, dan leh thupek kengkawhtu (enforcement agencies), Mizoram chief electoral officer, state police nodal officer leh Central Armed Police Force hmalakna leh ruahmanna an siam te, boruak muanawm tak hnuaia inthlan felfai leh thianghlim a awm theih nan an endik.
Ruahman lawk ang chuan, vawiin – August 30 hian Aijal Club-ah vek chief secretary leh director general of police an kawm dawn a; Mizoram district 11-a district election officers leh superintendent of police-te inbuatsaihna an thlirho dawn. Tlaiah thuthar thehdarhtute kawm an tum a ni.
A ni thum ni-ah Systematic Voters Education and Electoral Participation (SVEEP) hnuaia hmalakna a hmuna an endik dawn bakah state icon-te leh PwD (vohbik) voters leh young voter-te nen inkawm tura ruahman a ni bawk.