Ecuador leh US sipaiten ruihhlo do hna thawkho

Ecuadorean leh US sipaite chuan South America rama firfiak pawla chhal nia an sawite beihpui thlakna an kalpui niin US sipai Southern Command chuan Thawhlehni khan a sawi.
Southern Command chuan he hmalakna hi ruihhlo zuarte dona tura hmalakna a nih thu sawi mah se X-a thuchhuah an siamah hian a kimchang engmah an tar lang lo.
He thu hi Ecuador President Daniel Noboa-a’n a hma ni chiaha Ecuador-in ruihhlo tawlhtu pawlte laka indona a kalpui mek ‘thawh thar’-a an chhehvel ram tel zingah US pawh a tel tih a sawi tukah puan a ni.
Noboa-a chuan tunah hian khawvela cocaine 70% vel chu Ecuador lawng chawlhhmun lian tak takah kaltlang niin a sawi a, ruihhlo zuar pawlte tan chuan sum lakluhna hmun pawimawh tak an ni mek.
Khawvela cocaine siamtu lian ber pahnih, Colombia leh Peru nena inthenawm an ni bawk.
Beihpui thlakna thar ber hi Ecuadorean-ten Pacific hmar lam biala US-in a awmna huang zauh a tumna an duh lo tih an tihchian hnu thla lia thleng a ni a, an rama ram dang sipai hmunpui awm leh an phal lo tiin vote an thlak a ni.
Mipui ngaihdan hi US President Donald Trump-a thian tha, Noboa tan chuan a pawi hle a, ani hi mi sual pawl dona leh tharum thawhna nasa tak tihziaawmna tura beitu a ni.
Tun hnaiah he ram hi khawvela ruihhlo tawlhrukna hmun lian ber pawl a ni mek.
Thawhlehni khan Noboa hian Quito-ah US Southern Command hotu, Francis Donovan leh Central leh South America leh Caribbean-a US Special Operations hotu, Mark Schafer te a bia.
Hetah hian thlawhna tumhmun leh lawngchawlhnaa an thil hriatte inpeka beihpui thlakho dan tur ruahmanna an sawiho niin a pisa chuan a sawi.
He biala ruihhlo tawlhruk do hi US tan chuan thil pawimawh tak a ni.
Trump-a sorkar hian September thla atang khan Caribbean tuipui leh Pacific tuipuiah ruihhlo lawng nia sawite vawi 40 chuang zet thihna thlen theiin beihpui a thlak tawh.
January thla khan Venezuela President Nicolás Maduro chu a man a, ani hi ‘ruihhlo tawlhtu firfiak’ nia puhin US-a cocaine ‘ton sang tam tak’ phurh luh theihna a siamsak niin an sawi.
Thla hmasa khan Trump-a hian Colombian President Gustavo Petro chu White House-ah a hmu a, thla tam tak chhung an pahnih inkara buaina nasa tak a awm hnua an inhmuh lehna hmasa a ni.
Trump-a hian Petro-a leh a sorkar chu US-a ruihhlo luang lut tur titawp thei lovah a puh fo tawh a, beihpui thlakna tihzauh chuan Colombia pawh a beih theih thu a sawi tawh nghe nghe.