Education Reforms leh a behbawm…

Mizoram Education Reforms Committee (MERC) thutkhawm vawi 10-na chu nimin khan an thu khawm a, an thurelte chu – Private School Recognition Rules chungchangte, Mizoram Education Transfer & Posting Rules chungchangte, State Level Public Consultation chungchangte leh ‘Education Reforms Campaign’ chungchangte a ni.
MERC a din chhan chu – Mizorama zirna siam that nan zirchianna leh rawtna hrang hrangte sawrkara thlen thin a ni.
MERC hi tun sawrkar thar hnuaia din a ni a, sawrkar thar hi thla 15 vela upa a ni tawh a, MERC thutkhawm vawi 10 neih tawh a nih chuan, thla tin deuhthaw an thukhawm tihna a ni.
Education reforms han tih hian, ‘educational system’ siam danglam/siamthat a kawk deuh ber ang a, chu chu zirlaiten thiamna dik an puakchhuah theihna tura tha zawk, sawt zawka zirna kalpui dan tur lam a hawi deuh awm e.
Kan hriat angin kum 2009 khan Education Reforms Commission din a ni a, kha commission dintu sawrkar pawh kha a inchhuang hle a nih kha. Mahse, commission report (2010) a lo chhuak a, sawrkar chuan tha ti hle mah se, tihlawhtling tura senso ngai zat (200 Crs) chu state sawrkarin a huphurh deuh a. A hnuah sawrkar laipuiin state tinte CCE zawm vek tur a rawn tih takah khan, kha ERC report 2010-a suggestions (proposals/recommendations) thenkhat leh CCE kalphung inang a awm tak nual avangin, ERC rawtna anga kal chho ta anga hmehbel chhoh nawk nawk a ni ta tho a. ERC khan a cover zau ang reng hle a, pre-school leh professional education inkar kha a terms of reference a ni tawp mai.
Tuna Mizoram Education Reforms Committee hian ‘recognition rules’ tih te, ‘transfer and posting’ tih vel te a hma tel vek dawn a nih hmel a. Mizoram zirna siam that hna thawk tura ngaih ten ‘transfer and posting’ thlenga an buaipui dawn a nih chuan an hma hi a zau viau dawn tihna a ni awm e. Tuna zirna ina zirlaite thiamna kan pek dan kalhmang (educational system) hi eng lai hi nge dik lo ni ang a, engtia siam that nge tha ang tih te, extracurricular activities kan kalpui tha em? kan kalpui a nih pawhin kan kalpui dan hi a tha tawk em? tihte leh teaching method/learning method etc. lamah improvement nei turin engtia kalpui nge tha ang tih ngaihtuah hi education reforms (zirna siam that) in a kawh ber tur chu niawm tak a ni.