EFCI hruaitu mawhphurhna inhlan

Kum 2024- 2028 chhunga Evagelical Free Church of India (EFCI) tharte chuan hruaitu kalchhuak ta te hnenah mawhphurhna an la.
EFCI kohhran hruaitu lu bera thlan thar Rev Simon L Darngawn chuan Ningani khan EFCI Gen. Hqrs hmunpui Shillong-ah president kal chhuak Rev Lallienvel Pakhuongte hnen atangin president mawhphurna a la a.
Charge inhlanna hi Demthring Shillong-a EFCI Hqrs nghahna tualchhung kohhran, Shillong local biak inah neih a ni.
EFCI Meghalaya Presbytery huamchhunga bial leh tualchhung kohhran hruaitute bakah Shillong-a Zohnahthlak kohhran zinga pastor ho, NEICC general secretary Rev Dr Ramengliana leh NEICCWA secretary Jessie Lalramneli te pawhin an telpui a ni.
EFCI Gen. Hqrs hruaitu lu (administrative heads), executive committee member-ah hian, president: Rev Simon L Darngawn, vice president: Rev Lallienvel Pakhuongte, secretaries: Rev C Kawldinglien Joute, Rev Lalrotluanga Darngawn, Rev Hrangchunghnung leh Rev Jessai L Neithâm te an awm a ni.
EFCI kohhran inhruai danah executive committee member paruk zinga 5 hi Gen. Hqrs office Shillong-ah an thu a, Mizoram Regional Hqrs office Aizawlah mi 1 a thu a ni.