Ei leh bara intodelh turin hmachhawp kan nei tam – PC Vanlalruata

Agriculture minister PC Vanlaruata chuan ei leh bara intodelh turin hmachhawp tam tak an nei a, chutah chuan an department chu a hnarkaitu an nih avangin theihtawp an chhuah dawn tih a sawi.
Thawhlehnia Mamit district Nalzawl khuaa ZPM party programme buatsaih a hmanpuinaah PC Vanlalruata chuan, kalphung tharah mipuiin beiseina an neih san em avangin ZPM sawrkar a ding a, Pathian leh mipui zara he sawrkar hi ding thei a nih avangin ram leh mipui tan theihtawp an chhuah zel dawn tih a sawi.
“Ei leh bara kan intodelh theih nan hmachhawp tam tak kan nei a, ka department chan hi a hnarkaitu pawimawh tak a nih avangin theihtawp ka chhuah dawn a ni,” a ti.
Hun kal tawha tih danah thil fuh lo leh felhlel a awm a nih chuan siamthatu nih an tum tur a ni tih sawiin, kuthnathawktute chu kan ram leh hnam din chhuahna atana a kila lung tangkai tak an nih avangin an dinhmun chawikan chu an thupui ber pakhat a ni reng dawn tih minister hian a sawi a. Thawhrimna leh rinawmna tel lo chuan hmasawnna a tluantling thei loa, chunglam malsawm tlaka hna thawk turin mi zawng zawng a sawm tih a sawi a ni.