Eirukna tihbuai theih tana hmun awm lo sawrkar tiam

Eirukna in a tihbuai theihte tana hmun awm loh na sawrkar din an tum tih Congress president Lalsawta chuan a sawi.
Mara District Congress Committee Special Conference chu Ningani khan Siaha-ah hman a ni a. Hmanpuitu MPCC president chuan Congress chhuahsan tawh leh la ni ngai lote pawh kan ram, kan hnam leh kan sakhua humhim a, sawrkar tha siam tura let turin a sawm. “Eirukna in a tihbuai theihte reng reng tana hmun a awm lohna sawrkar, a duh zawng vana mi’n an tih anga, he leiah pawh Lal Isuaa din hi kan tum. Chutiang tur chuan sum tam tak hmanga inthlan hmachhawn aiin Pathiana rinna nghat chunga inthlan hmachhawn hi ramin a mamawh a, hei hi Congress party-in sawrkar tha siam kan tum dan a ni,” a ti.
Kan sakhua chhanhim chu mutmawh hnarmawha neih a ngai tih sawiin, “Kristian sakhaw nuaibo tumtu BJP kan thawhpui dawn lo, tih hnua thawhpui leh zel MNF party, BJP thawhpui tur leh tur loh pawh chiang lo, thiana siam tuma BJP Mizorama an len theihna tura kawng sialtu tualto party ZPM hi innghah ngamna an ni lo,” a ti.
Congress Legislature Party leader Zodintluanga chuan Siaha-a development chhuanawm leh rotling tam ber chu Congress sawrkar siam a ni tih a sawi a. NLUP-ah party thliar hrang loin eizawnna nei lote hnenah chhungkaw sing tel tanpuina an pe a. MNF chuan cheng nuai 3, NLUP dawng tawhte pawhin an dawn leh vek tur tiam chungin Rs. 25000 an sem ve nial nual tih a sawi. “MNF sawrkar hian a thu in lei an verh a, a thu in kawng chhawng an siam a, a thu in Assam Rifles an sawn chhuak a, a thu in SEDP an sem a, a thuin damlo apiang tana hman tur cheng nuai 2 an dah a.A taka tih hmuh tur awm si lo,” a ti.
Lawngtlai West bialtu MLA C Ngunlianchunga chuan Mara, Lai leh Chakma Autonomous-te tan Congress-in hmasawnna leh tanpuina fel takin a kalpui a. Mahse central-ah BJP a sawrkar a, state ah BJP fachuam MNF an sawrkar bawk a. BJP leh a thawhpui MNF te’n hmasawnna leh sawrkar tha siam tum loin mipui thlan roreltute chu sum hmangin an namthlu, tiin a sawi.
He hunah hian Siaha East-I bial MDC by-election neih tura Congress candidate atan F Lallawmawma puan a ni a; MLA inthlana Palak biala an party ticket-a ding turin IP Junior puan a ni bawk.