El Bakkali, Hall leh Kennedy-te kutah gold a lut
Nilaini zan khan Paris khawpui Saint-Denis venga stadium ropui Stade de France-ah athletics gold an semchhuak leh nual a, intlansiak dan chi hrang hrang result thlirkual ila.
Morocco superstar Soufiane El Bakkali chuan Olympics men’s 3000 metres Steeplechase final-ah line a pel hmasaber zo lo mai ang aw tih laiin last second-ah a theihna a rawn phochhuak leh a, silver medallist Kenneth Rooks of the United States hmakhalhin a title kawl lai a humhim a, Abraham Kibiwot of Kenya kutah bronze medal a lut ve thung.
Khati chena thui tlanchhuak turin El Bakkali khan minute riat leh second 6.05 a hmang a; silver awrhtu American Rooks (8:06.41) a lehpelh hnuah Moroccan khan line thlen dawnah a ban a han tikau leh pawp a; kum 1932 leh 1936 champion Volmari Iso-Holloand of Finland hnu lama he title humhim leh thei hmasaber niin, world title pahnih a lak tawh zat chiah Olympic title a sualchhuak tling ta a ni.
Final lap a ni a, metre 300 vel tlan tur a la awm tihah El Bakkali kha tlanho laihawlah Ethiopian world record holder Lamecha Girma nen hmasak inchuhin an inthlur tan tihin intlansiak kalkawnga zuankahlen tur lo awmah Girma a intauh bur a, tlankawngah tlu hlawm tawpin, a chet zui tak mai loh rualin medical staff an tlanlut nghal a, hlang hmana zawnchhuah niin, damdawi in lamah dahluh nghal a ni.
Final turn-ah El Bakkali khan Rooks a um pha hram a, gold hlawhchhuak zo ta lo mah se American khan mimala a tlan fuh ber hun tawngbuaiin silver a awrh.
El Bakkali men’s 3,000 metres steeplechase title kha Games kal laia Morocco medal hmasaber ni nghalin, kum thum kalta Tokyo ang bawka Moroccan flag khaikangtu a ni leh.
Kum 28 mi Soufiane El Bakkali kha double Olympic leh double world champion a ni ta.
Men’s 3000m Steeplechase final hmaa mite’n inthlurbing tura an beisei chu El Bakkali leh kum 23 leka upa Girma kha ni mah se Ethiopian a chetsual tak avangin world record holder chuan medal a hlawhchhuak zo lo a, damdawi in chaw a ei ta zawk a ni!
Paris 2024 organising committee chuan Lamecha Girma bawisawm tura on-site medical team an phet nghal vat vat thu kha tarlang chungin damdawi in lama purliam tak chu an ngaihtuah reng a, Ethiopian Olympic official-te nen pawh an inbiakpawh reng thu leh ngai awh leh thuai tura duhsakna an hlan thu thuchhuah siamin an tarlang.
Nikum mai khan Paris-ah bawk Girma hian men’s 3,000m steeplechase world record thar a siam a, Tokyo Olympic leh World Championship hnuhnung pahniha a ngam loh El Bakkali laka phuba lakna hun remchang a neih laiin vanduainain a tlakbuak zui ta tlat a ni.
US tana 400m gold latu Hall
Quincy Hall of United States chuan Britain tlanchak Matthew Hudson-Smith leh Zambia aiawh Muzala Samukonga hmakhalhin men’s 400 metres final-ah hnehna a chang a, kum 2008 hnu lama US-in Olympic 400 metres gold a lak leh vawikhatna chiah a ni.
Hudson-Smith khan hma a hruai zet avangin Chariots of Fire tia hminglem an pek Eric Liddell-a’n kum 100 kalta Paris Games-a he title a lo sualchhuah ve tawh hnu lama Great Britain kuta men’s 400 metres gold a luh leh vawikhatna hmel kan hmu dawn emaw tihna a len hman thuak dawn laiin Hall-a a rawn dawk zawk a, mimala he tlankawnga a hun hman tlem ber tum (43.40 seconds) hmangin Beijing-a hnehtu LaShawn Merritt hnu lamah US-in 400 metres title hawn thei fa a hring leh ta a ni.
Hudson-Smith hian silver zawk awrh mah se European record (43.44) a lo siam tawh kha a khum ta tho a; Zambia athlete kum 21 mi lek Muzala Samukonga pawh khan bronze a lakna kawngah a zawnin Paris-ah national record thar a siam ve bawk.
Kennedy kutah women’s Pole Vault gold
Mautlawn hmanga zuang sang Australia nula Nina Kennedy chuan tun season-a a zuan fuh ber tawngbuain metre 4.90 nen women’s Pole Vault final-ah gold medal a la.
Kum 27-a upa Kennedy hnung chiahah hian 4.85m hlentu Tokyo gold medallist leh vawihnih world champion ni tawh bawk Moon chuan silver a sualchhuak a; Canada mi Alysha Newman pawhin heti zata sang hi zuankhum ve bawk mah se zuan fuh loh a ngawh zawk avangin bronze pek a ni.
Kennedy leh Moon hian nikum Budapest-a World Championships-ah khan 4.90m ve ve bak pel zo loin gold medal an lo chang dun tawh a, kumin Paris Games-ah chuan Moon hian Budapest-a a thlen chin a pha ve ta lo a, bronze a lungawipui mai a ngai ta a ni.