Electric bill sang leh thut thin enfiah ang

Chenna ina electric bill sang leh thut thin chu a tul ang zelin department lamin an enfiah dawn tih Power & Electricity minister F Rodingliana chuan a sawi.
Assembly Session-a zawhna chhangin P&E minister chuan, electric bill sang awm thin chu a system dik lo a awm nia a lan thu a sawi a. Khawl thil a nih avangin a mumal lo zeuh zeuh a, department lamin an ennawn turah a ngai tih a sawi a ni.
“Smart meter vuah turin central-ah kan dil mek a, hei hian electric bill sang vak thin pawh a chinfel ngei rin a ni. Hei hi kan hman theih chuan pre-paid a bill pek pawh a keng tel dawn a ni,” a ti.
Electric current kal dik loh vanga consumer-te bungrua a chhiatin complaint theih a ni a, sawrkarin a ngaihtuahtu tur Committee-in a dinin uluk takin a zirchiang anga, an ni rel ang leh thil chhe zat azirin zangnadawmna a ngaihtuah sak thei a. Amaherawhchu, electric current kal dik lo chu a chhan leh vang hriat hmasak a ngai a. Dan kalha mipui leh consumer-ten wiring leh connection tidanglama an lo khawih chingpen chuan dan anga hrem theih an ni zawk tih minister hian a sawi bawk.