Ella Langley “Choosin’ Texas” a Hot ber

Ella Langley “Choosin’ Texas” chu Billboard Hot 100 (US singles) chart-ah No.1 a kai thar leh ta a, a zawn lovin he chart-ah hian kar hnih a No.1 tling ta. Hetihrual hian Megan Moroney album “Cloud 9” chu Billboard 200 (US albums) chart-ah a lo No.1 bawk a, chart record siamin, 1958 atanga Billboard Hot 100 chart an tihchhuah atanga Hot 100 leh Billboard 200 chart-ah country music chauh record thin hmeichhe zaithiam te a ruala an No.1 vawi khatna a ni.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
“Choosin’ Texas” hian US-ah kar khat chhungin stream maktaduai 20.4 leh radio airplay ngaithlatu maktaduai 41.8 neiin, sales 6,000 a la nei bawk a, hei hi a tum hnih nan a No.1 pui leh ta a ni.
Olivia Dean “Man I Need” chu No.2-ah bawk a la awm.
Chart No.1 hlui Alex Warren “Ordinary” chu No.5 atangin No.3 a kai thar leh ta a, he hla hi nikum June-August khan chart-ah kar 10 chhung a lo No.1 tawh. Tihian Hot 100 chart top 3-ah kar 33 a awm tling tawh a, he chart top 3-a lang rei thei ber a la ni.
Taylor Swift “Opalite” chu No.1 atangin No.4-ah a tawlh a, he hla Swift hla No.1 kai thei 14-na niin, kar kalta chart-ah khan No.1 a rawn inhlangkai a, tunah No.4-ah a tawlh leh ta a ni.
Chart No.1 hlui, Bruno Maes “I Just Might” chu No.6 atangin No.5-ah a insawn leh hret a, chart No.1 hlui HUNTR/X “Golden” chu No.7 atangin No.6 a kai thar leh ta a, chart No.1 hlui bawk Bad Bunny “DtMF” chu No.4 atangin No.8-ah a tawlh a, top 10 atanga chhuak tawh Sombr “Back to Friends” chu No.11 atangin No.9 a kai thar leh ta a, Kehlani “Folded” pawh No.13 atangin No.10 a rawn kai thar ve leh ta bawk.