Thawhtan zan khan English Championship khelh chhunzawm a ni a, an muala an chak pahnih Leeds United leh Burnley te chu EPL-ah an kaisang. Leeds United leh Burnley te hi EPL season tharah kan hmu leh dawn.
Championship-a hmahruai mektu Leeds United hian an mual Elland Road-ah Stoke City an mikhual a, chak an mamawhna inkhelah 6-0 ngawtin hnehna an chang. Leeds hian an mualah bul an tan tha tak zet a, chawlhlawk hmain goal nga ngawt an thun hman. Inkhel tan atanga minute Joël 6-na lekah Piroe chuan hmahruaina goal a thun a, ani hian minute 8, 20 leh 41-ahte goal a thun belh zui leh a, inkhel pawimawh takah hattrick a siam. Piroe bakah hian Junior Firpo leh Wilfried Gnonto ten goal khat ve ve an thun bawk a, an mualah an chak chiang hle.
Leeds United an chak hnu hian pahnihnaah awm mek Brunley leh pathumnaa awm mek Sheffield United te an inhmachhawn zui ve leh. Burnley hi an mualah tlawm se EPL-a kaisang tur a la chiang thei rih dawn lo. Heti a nih vang hian he inkhel hi Leeds United leh Burnley tan pawh inkhel pawimawh tak, EPL-a an kaisan leh kaisan loh hril rihtu a ni. Inkhel ngaihven hlawh takah Burnley hian an mikhual Sheffield United hi Josh Brownhill goal hnih thun hmangin an hneh a, pahnihnaah an insawh nghet.
Hmahruaitu Leeds United hian khelh 44 atangin point 94 an hmu mek a, hma an hruai chhunzawm. An hnuai chiaha awm Burnley nen hian point 94 ve ve an hmu ve ve a, table chung pahnih an luah tlang dawn tih a chiang nghal a, pathumnaa awm mek Sheffield United tan umphak theih an ni tawh lo. Championship season kal mekah khelh hmabak pahnih a la awm a, Leeds United leh Burnley te hian champion an inchuh zui ang.
Championship-a sang pahnihte hi direct in EPL-ah an kaisang a. Pathumna atanga paruknaa awm ten play-off an khel zui ang a, champion team chu EPL-ah an kaisang zui ve leh ang.
EPL-ah Leeds leh Burnley an kaisang
Get real time updates directly on you device, subscribe now.
Prev Post