Erick-in Mexico chhim nuai, hnawlte thian fai mek

Erick-in Mexico chhim nuai, hnawlte thian fai mek
Mexico chhim lam, Pacific vaukam hrul chu Category 3-a na Hurricane Erick-in a nuai hnuah Ningani chawhnu atang khan hnawk an inthian fai mek.
Khualzinte tlawh thin khua, Oaxaca state-a Puerto Escondido-ah chuan thlipui leh ruahin a tihchhiat avangin electricity a awm lo va, phone pawh a hleihtheih loh va. Damdawi in pahnih telin khawlaite chu tuiin a chim nasa hle.
Thi leh hliam erawh an awm hriat a ni rih lo va. Erick hi khawmual a kai hnu lawkah a chakna hloh zuiin Category 1-ah a tla nghal a, hetih lai hian US National Hurricane Center (NHC) chuan hmar lam panin tui lian thlenin thli na tak a la keng tel zel dawn tih an sawi.
NHC chuan ‘nunna atana hlauhawm khawp’ ruah leh thil a la awm thei tih sawiin Mexico-a environment ministry pawhin metre 10-a sang tui fawn a la awm thei tih a puang bawk.
Erick-in khawmual a kaina bul lawk, Puerto Escondido-ah hian chenna in tam tak a chhia a, kawngpuite pawh tui lianin a chim nasa a, hnawl a tam hle a. Insenghawi hna thawkte pui turin sipai tirh luh an ni.
Kum 44 mi sumdawng, a dawr pawh tuiin a chim vek, Luis Alberto Gil chuan hetianga tui tamin a la tihbuai ngai loh thu AFP hnenah a sawi.
Sorkar hnuaia utility CFE chuan Oaxaca-ah hian in 1,20,000 chuangin power an nei lo tih sawiin Ningani chhunah kha chuan hmun lia thena hmun khat vel an titha leh hman tih a sawi.
Oaxaca-ah hian thli hi darkar khata km 205-a chaka tlehin a hnu darkar khat velah a tlahniam.
Pacific tuipui kam atanga hmar lam km 400 vela hla, lawngchawlhna leh chawlh hmanna khawpui, Acapulco-ah chuan mi cheng leh mikhualte chu insaseng tura tih lawk an nih angin khawlai a reh hle a, khualzin lawnglengte pawh a chhiat loh nan hmun himah dintir vek an ni.
A hma niin mi tam tak chuan ei tur, tui leh tuialhthei an lei lawk bawk.
Ningani zan (India-a Zirtawpni chawhma) thleng khan Oaxaca leh an thenawm, Guerrero-ah chuan nunna atana hlauhawm khawp tui lian leh lei min a la awm thei tiin inralrinna la tihrik a ni a. Tuipui pawh a la phul nasa hle.
Hetih lai hian NHC chuan Erick hian chak takin a chakna a hloh nia sawiin Ningani chawhnu (India-a Zirtawpni tlai) kha chuan a thamral zui tih an sawi.
President Claudia Sheinbaum-i chuan a hmain hmun hniam lai leh lui hnaiha awmte chu hmun hima insaseng turin a ti lawk a. Insasengna hmun tur hi Chiapas, Guerrero leh Oaxaca-ah hmun 2,000 vel ruahman a ni.
Mexico chhim lam hi kum 2023 khan Hurricane Otis-in na taka nuaiin Category 5 hurricane hian Acapulco pawh a nuai na hle a, mi 50 vel an thi a. Otis hi a thlen ran em avangin mi tam tak an inring hman lo.