Europe inkhel result \henkhat thlirkual ang

Europe inkhel result thenkhat thlirkual ang
Pathianni zan khan Europe-a club lian thenkhat Real Madrid, Atletico Madrid, Napoli, Bayern Munich leh Borusia Dortmund tihte an chechhuak a, an result thlirkual thuak thuak teh ang.
La Liga season thara a vawikhatna atan Real Madrid an chak ve ta a, Santiago Bernabeu khelmualah sithum faia an mikhual Real Valladolid hnehin, an chakna goal thumte hi second half-a Federico Valverde, Brahim Diaz leh Endrick-te thawhkhawm a ni.
Tun kha star hraw an sengluh thar Kylian Mbappe tan defending champion a zawm hnua a home game hmasaber niin, France captain an sengluh hnuah Real Madrid hi ‘New Galacticos’ ti hialin han ko tha leh bawk mah se Mbappe hian Spain leilunga a mutbu a putluh hnuah chetthat a la harsat chhunzawm ta zel a, Pathianni zan Bernabeu match-ah pawh goal a khung zo lo mai ni loin hmuhnawm thamin a inlarchhuak zo leh ta rih lo!
Chawlhkar hnih liamta mai khan Mbappe era an tih mai intan hnua Europe club competition khuhhawnna inkhelah sihnih faia Europa League champion Atalanta hnehin UEFA Super Cup an chawi a, mahse, a hnu lawkah La Liga season an tan a, Mallorca mualah 1-1 draw an hlawhchhuak thei hram a, season thara an league match hmasaberah erawh point thum an thawkchhuak ta a ni.
He thu buatsaih lai thleng hian khelh hnih atanga point li hum chungin Real Madrid chuan La Liga table-ah pathumna an luah mek a, an chungah hmahruaitu pahnih Barcelona leh Celta Vigo an awm.
Atletico Madrid 3-0 Girona
Real ang bawka season thara an vawikhat chakna ni turin Atletico hian tun season-a home game an khelh vawikhatnaah hnehna an sualchhuak a; Civitas Metropolitano stadium-a an goal thumte hi Antoine Griezmann, Marcos Llorente leh caaptain Koke-te thawhkhawm a ni.
An league bultanna inkhela mualneitu Villarreal nena inhnehtawk tawh Atletico Madrid pawh hian khelh hnihah point li an nei.
Bundesliga lam ve thung
Volkswagen Arena chhunga mipui 30,000 chhuakkhawm hmaah hun tawp hnaih lama Serge Gnabry goal hmangin Bayern Munich chuan 3-2-in mualneitu Wolfsburg an hneh hram a, manager thar Vincent Kompany hnuaia Bundesliga game an khelh vawikhatnaah an chak zo lo teuh hle.
Tun kha Bundesliga bultanna inkhela tum thum goal a khungna ni tawhin, heti zet game-ah hian goal li a tilut tling.
Bayern goal hmahruai hi minute 19-a Jamal Musiala thun niin, second half tir lamah Jakub Kaminski chuan an lam goal-ah a tilut palh a, minute 82-ah Harry Kane thawhrah atangin Gnabry chuan Wolfsburg debutant goalkeeper Kamil Grabara ven goal-ah mikhual team chakna goal a khung zui ta a ni.
Wolfsburg goal hnih hi second half tir lama Lovro Majer thawh ve ve niin, a hmasa zawk hi spot-kick atanga a chhuihluh a ni nghe nghe.
Kha game-ah khan minute 65-a khelmual lut veteran striker Thomas Mueller chuan an club record ding lai nihrualpuiin Bayern tan competitive match 709 a khel tling chiah.
Record siama German champion ni ngun ber Munich hian season liamta khan Bundesliga lamah pathumna luah pha chauhin, an coach chhawr lai Thomas Tuchel ban hnuah Burnley manager hlui Kompany an senglut a, Belgian coach hnuaia an league game hmasaberah an chak ta phawt.
Inrinni lama German top flight inkhelah Borussia Dortmund pawhin sihnih faia Frankfurt hneh chungin league bul an tan ve bawk.
Season liamtaa pangana luahtu Dortmund chakna goal hnih hi England under-21 international Jamie Bynoe-Gittens an tihin bench a thawhsan hnua a thun ve ve a ni.
Napoli 3-0 Bologna
Season thara Serie A home match an khelh vawikhatnaah Napoli an chak nghal a, manager Antonio Conte hnuaia hnehna an sualchhuah vawikhatna a ni nghal.
Mualneitu team chakna goal thum hi Giovanni Di Lorenzo, Khvicha Kvaratskhelia leh substitute Giovanni Simeone-te thun niin, Diego Armando Maradona stadium-ah season liamtaa 10-na ni pha chauh Napoli hian kum liamtaa an mangchhia theihnghilh turin bul an tan fuh phawt.
2023 champion Napoli hian kumin April ni 28 khan he khelmualah hian 2-2-in mikhual AS Roma an inhnehtawkpui a, tun hi kha mi hnua home fans hmaa competitive goal an thun leh vawikhatna chiah a la ni.
Pathianni khan Fiorentina chu kaithar Venezia nen goal thun loin an inhnehtawk a; si phur hmasa zet chungin Torino chuan an mikhual Europa League winners Atalanta lakah 2-1 hnehna changin, Empoli pawhin Roma mualah 2-1 hnehna bawk an chang.