Excise & Narcotics mitharte inzir ho

Excise & Narcotics mitharte inzir ho
Central Training Institute Sesawng-a 11th Batch Excise & Narcotics basic training zote pualin Nilaini khan a hmunah hian ‘Passing Out Parade’ hman a ni a. Excise & Narcotics minister Lalnghinglova Hmar leh adviser to chief minister Lalmuanpuia Punte ten an hmanpui.
Excise & Narcotics minister chuan, an department chu chief minister thlawpna hnuaiah department hmasawn ber zing ami a ni tih a sawi a. Department-ah thawktu indaih lohna a nasa a, tun kum hnih kalta chhungin thawktu thar 28 direct recruitment-a lak an ni tawh a, mi 41 lak belh lehna tur pawh buaipui mek niin, post thar 16 siam a ni tih a sawi.
Heng bakah hian district thar pathumah Excise Station hawn a ni a, inspector awpna hnuaia awm thin kha Lawngtlai nen assistant commissioner awpna hnuaiah an awm tawh a. Tunah Sairang leh Bairabi-ah Excise Station hawn phalna an nei leh tawh tih a sawi bawk.
Excise & Narcotics Deaprtment-in tunhnaiah lirthei thar 21 an dawng a, ruihhlo dona tura sawrkar inbuatsaihna vek a ni tih Lalnghinglova Hmar hian sawiin, training chhuak ta te chu, indo an ni a, an dote lamah an tan a thiang lo tih hrereng a, ruihhloa inhnamhnawih lo turin a chah lawk a ni.
Adviser to CM chuan END-a thawktu lak tharte chu party induhsakna tel loa fair taka lak an ni tih a sawi a. Mahni inrintawkna nena tha taka hna thawk tura fuihin, dan ang taka lak an nih angin, dan ang taka thawk turin sawrkarin a phutlet dawn tih a sawi a ni.
Training hi 2025 September 1 atanga neih tan a ni a; training chhuakte hi an vaiin mi 22 niin, sub inspector 12 leh constable 10 an ni. Training chhunga titha zualte hnenah lawmman hlan a ni.